iklan

OPINIAUN

Estudante universitáriu konsidera liberdade espresaun-imprensa kontribui ba dezenvolvimentu nasaun

Estudante universitáriu konsidera liberdade espresaun-imprensa kontribui ba dezenvolvimentu nasaun

Estudante Departementu Komunikasaun Sosiál UNTL, Joanito Freitas de Araújo. Imajen Tatoli/Osória Marques

DILI, 01 maiu 2024 (TATOLI)—Estudante Departementu Komunikasaun Sosiál Univerdade Nasionál Timor-Lorosa’e (UNTL), Joanito Freitas de Araújo, konsidera liberdade espresaun no imprensa bele kontribui ba dezenvolvimentu nasaun ida.

“Ita-nia Konstituisaun RDTL rekoñese kona-ba liberdade espresaun no liberdade imprensa ne’ebé ko’alia iha artigu 40 no 41, hateten liberdade asesu informasaun no liberdade espresa saida mak ita iha ligadu ho asuntu polítika, dezenvolvimentu no seluk tan. Entaun, tuir ha’u-nia kompreensaun, katak saida mak ita sente no saida mak haree, atu hato’o pensamentu krítiku relasiona ho dezenvolvimentu ne’ebé la’o iha ita-nia rain, karik sala, ita nu’udar sidadaun ida ne’ebé hakarak kontribui ba dezenvolvimentu,” Estudante universitáriu hateten ba Agência Tatoli, iha resintu Kampus Merah, Caicoli, kuarta ne’e.

Tuir nia perspetiva, liberdade espresaun no imprensa iha Timor-Leste laiha dúvida tanba ema hotu iha direitu hato’o no espresa saida mak sente no laiha limitasaun.

“Iha Timor-Leste iha duni liberdade espresaun no imprensa tanba opiniaun husi sosiedade hotu, laiha limitasaun ruma husi nia opiniaun,” nia akresenta.

Liberdade espresaun no imprensa rekoñese iha Konstituisaun RDTL artigu 40 ho 41, ne’ebé hateten sidadaun hotu-hotu iha direitu atu hato’o no espresa no hotu-hotu regula iha lei nia okos.

Konseitu liberdade imprensa hodi ko’alia no hasai opiniaun ka informasaun sira nu’udar direitu obsolutu bazeia ba Konstituisaun no konvensaun internasionál
hirak ne’ebé Timor-Leste ratifika ona. Maibé, liberdade hirak-ne’e presiza komprieende, katak la’os liberdade ne’ebé absoluta no laiha limitasaun.

Notísia relevante : SEKOMS hakarak hasa’e índise liberdade imprensa iha Timor-Leste

Atu prevene la uza sala, mídia nu’udar dalan ida hodi halo defamasaun, trata-malu, voatu ho
seluk-seluk tan presiza kria lei ida, ho objetivu la’os atu taka metin ka kesi metin liberdade imprensa maibé atu kria mídia komunikasaun sosiál sai profisionál, iha responsabilidade nomós hodi respeita direitu pozitivu no direitu umanu tuir buat ne’ebé konsagra ona iha Konstituisaun no konvensaun internasionál.

Estudante husi Siénsia Polítika UNTL, Vatrisia Aprilia Amaral. Imajen Tatoli/Osória Marques

Nune’e mós, Estudante husi Siénsia Polítika UNTL, Vatrisia Aprilia Amaral, hateten, liberdade espresaun ne’e presiza espresa saida mak iha no sente.

“Ita ko’alia kona-ba liberdade, katak sein limitasaun ka laiha ema ida mai atu koko limita ita-nia liberdade. Agora kona-ba liberdade espresaun mak ita presiza liberta sai saida mak ita hanoin. Ita-nia espresaun ne’e presiza hato’o ka ko’alia sai ba ema. Ida-ne’e mak dehan liberdade,” nia tenik.

Dosente Komunikasaun Sosiál UNTL, Roberto Pacheco, konsidera liberdade imprensa no liberdade espresaun presiza tuir regra, katak bainhira prodús notísia tenke tuir kódigu deontolojia ne’ebé iha.

“Liberdade ona maibé labele halo konforme tuir ita-nia hakarak, lae, tenke iha nia limitasaun. Iha Timor-Leste ba momentu ida-ne’e, ha’u haree liberdade boot tebes-tebes, hanesan Sudeste Aziátiku, ita Timor iha númeru um, signifika katak ita iha liberdade espresaun, liberdade opiniaun, ne’ebé laiha sensor ka limitasaun ruma husi makaer ukun sira, tanba ne’e mak ita okupa primeiru lugar iha Sudeste Aziátiku,” Pacheco dehan.

Maski nune’e, ema ne’ebé haknaar-an iha mídia mak hatane tanba nia nota iha mídia balun ne’ebé halis ba grupu balun, entaun produtu ne’ebé iha ne’e la tuir saida mak sosiedade sente no espresa.

Hirak-ne’e hotu Konsellu Imprensa halo sensibilizasaun ba Konstituisaun RDTL artigu 40 ho 41 ne’e ba públiku, no ida-ne’e Konsellu Imprensa halo hela de’it no parte Departementu Komunikasaun Sosiál iha UNTL, ne’ebé iha matéria ida kona-ba deontolojia ne’e, sempre sensibiliza nune’e jornalista ka mídia hodi tuir regra jornalismu ne’ebé iha.

“La’os dehan ita la halo sala, ita ema ne’e sempre halo sala, maibé tenke rekoñese ita-nia pontu fraka no forte ne’ebé iha, nune’e bele fó rezultadu ba ita-nia kobertura,” nia fó hanoin.

Tanba ne’e, Dosente ne’e husu atu hariku opiniaun liuhusi lee barak, tanba oinsá atu hakerek di’ak bainhira la lee.

“Maiória iha rede sosiál espresa opiniaun la tuir regra. Entaun, tenke lee barak, koñesimentu di’ak, buat hotu sei la’o di’ak,” nia salienta.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!