DILI, 02 Maiu 2024 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, husu ba mídia sira atu promove inkluzaun iha setór komunikasaun sosiál, liuliu fó oportunidade ba ema ho defisiénsia sira atu partisipa iha dezenvolvimentu país nian.
Liuhusi semináriu ho tema “Promove Inkluzaun iha Komunikasaun Sosiál”, Expedito Dias dehan Governu hakarak tau prioridade oinsá atu fó atensaun ba ema ho defisiénsia, tanba sira parte ida husi prosesu dezenvolvimentu nasionál ida ne’ebé inkluzivu, katak lahusik sidadaun ida iha kotuk (tuir ODS 10).
“Signifika ema hotu tenke partisipa iha prosesu dezenvolvimentu nasionál ne’e, inklui maun-alin sira ne’ebé defisiénsia”, governante ne’e dehan iha ámbitu semináriu nasionál ne’ebé hala’o iha salaun São João Paulo II Comoro, ohin, ligadu ho Loron Mundiál ba Liberdade Imprensa no Liberdade Espresaun ne’ebé selebra iha kada loron 03 Maiu.
Tuir Expedito Dias, liberdade imprensa mak sai hanesan pilár ida importante ba demokrasia no pilár ida esensiál mós ba dezenvolvimentu inkluzivu. “Liberdade imprensa no espresaun mak nu’udar oksijéniu ba demokrasia. Ita hotu akompaña katak maluk sira ne’e mezmu ho kondisaun defisiénsia, maibé sira mós iha kapasidade atu fó sira-nia kontribuisaun ba dezenvolvimentu país ida ne’e nian. Ezemplu, ita ne’ebé ho kondisaun normál maibé ita labale hato’o informasaun ho jestuál, maibé sira bele. Entaun, ida ne’e ita tenke konsidera nu’udar kapasidade inkluziva ida”, dehan.
Nia salienta, informasaun sira ne’ebé dala barak fó sai husi televizaun no rádiu sira konsidera nu’udar kontribuisaun ida ba dezenvolvimentu país ne’e no sira daudaun mezmu sira iha kondisaun defisiénsia, sira mós harii ona rádiu komunidade defisiente ne’ebé instala iha Ai-mutin. “Rádiu ne’e ninia progresu di’ak tebes. Agora, sira mós halo streaming. SEKOMS apresia tebes ba esforsu ne’ebé sira halo no sei kontinua apoia hodi dezenvolve mídia ne’e”, promete.
Diretór Asosiasaun Defisiente Timor-Leste (ADTL), Cesário da Silva, realsa katak iha ámbitu selebrasaun Loron Mundiál Liberdade Impresa, SEKOMS koloka tópiku ida importante ba inkluzaun sosiál.
“Ha’u hanoin merese duni, tanba ne’e ho partisipasaun inkluziva defisiente sira-nian importante iha eventu sira hanesan ne’e atu tulun hodi divulga informasaun sira kona-ba oinsá inkluzaun ida loloos iha nasaun ne’e”, salienta.
Nia realsa mós katak situasaun sira ne’e dala barak ema haree inkluzaun defisiénsia ne’e nunka mais ho asaun, tanba ne’e maka liu husi atividade sira ne’ebé SEKOMS realiza ne’e konsidera nu’udar asaun pozitiva ne’ebé presiza duni atu hadi’a ba oin.
Governu adota polítika Objetivu Dezenvolvimentu Sustentavel (ODS) 17 no iha objetivu 10 ko’alia kona-ba Hamenus Dezigualdade, ne’ebé iha objetivu ida ne’e hakarak kapasita no promove inkluzaun sosiál, ekonómika, polítika, independentemente iha idade, seksu, defisiénsia, rasa, etnia, orijen, relijiaun, kondisaun ekonómika no seluk tan. Garante igualdade ba oportunidade. Redús dezigualdade rezultadu, elimina lei, polítika no prátika sira diskriminatória.
Notísia relasionda: SEKOMS hakarak hasa’e índise liberdade imprensa iha Timor-Leste
Jornalista: Tomé Amado
Editora: Maria Auxiliadora
