MKAS organiza workshop ho parseiru foku ba kestaun tolu

DILI, 02 maiu 2024 (TATOLI)—Gabinete Vise Primeiru-Ministru (PM), Ministériu Koordenadór Asuntu Sosiál (MKAS), no Ministériu Dezenvolvimentu Rurál no Abitasaun Komunitária, kinta ne’e, organiza workshop ho liña ministeriál no parseiru sira hodi koordena servisu asuntu sosiál ho tema ‘transforma moris, hanoin no futuru.’

“Ida-ne’e presiza interministeriál, Ajénsia ONU no Embaixada sira. Entaun, ita presiza iha taksforce ne’ebé boot no luan, ita-nia foku servisu ne’e ba buat tolu, ida mak prepara labarik kiik oan hodi investe para oinsá futuru la’o di’ak, seluk mak ko’alia kona-ba seguransa ai-han ho má nutrisaun ne’ebé a’as tebes no ida tan mak joven ne’ebé ita tenke prepara hodi nasaun ba oin. Tanba ita-nia nasaun hasoru problema boot tebes mak oinsá ita-nia oan sira-ne’e ita investe tanba sira mak futuru nasaun nian,” Vise PM, Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino, hateten, hafoin workshop iha auditóriu Ministériu Finansa, Aitarak-laran.

Tuir governante ne’e, kestaun tolu ne’e presiza koordenasaun no kolaborasaun entre liña ministeriál tanba Timor-Leste iha númeru a’as ba stunting krónika, no má nutrisaun, inklui prepara joven.

“Ita hamutuk hodi sai husi inseguru ba ai-han no má nutrisaun no ita prepara joven kiik-oan didi’ak hodi investe sira, no investe ba nasaun nia futuru,” Vise PM, salienta.

Notísia relevante : MSSI lansa portál seguransa sosiál Timor-Leste

Embaixadór Brazíl iha Timor-Leste, Maurício Miguel de Assis, konsidera, momentu ne’e hanesan oportunidade di’ak hodi diskute kona-ba implementasaun polítika dezenvolvimentu labarik sedu no planu operasionál.

“Ida-ne’e hanesan planu asaun nasionál konsolidadu ba nutrisaun, kestaun seguransa ai-han no planu asaun nasionál ba alimentar. Ha’u hein katak diskusaun ne’e hahú ohin sei fó oportunidade ba sira-ne’ebé reprezenta parseiru dezenvolvimentu sira atu kompreende di’ak liután ezijénsia Governu no povu ne’ebé laran-luak,” nia tenik.

Diplomata ne’e dehan, ida-ne’e hanesan oportunidade ida atu halo kooperasaun no finansiamentu internasionál.

“Kona-ba asuntu sosiál, foku espesífiku ba dezenvolvimentu labarik sedu, ita bele fó lisensa no nutrisaun seguransa ai-han inklui hasa’e estrutura koordenasaun ne’e esensiál ba implementasaun efetiva. Asaun sira atu aselera realizasaun programa IX Governu Konstitusionál nian no atu hetan rekursu sira,” nia tenik.

Jornalista     : Osória Marques

Editora          : Julia Chatarina