DILI, 02 maiu 2024 (TATOLI)—Parlamentu Nasionál (PN) felisita jornalista Timor-Leste ne´ebé sei komemora loron mundiál liberdade imprensa ne´ebé kada tinan mundu no Timor-Leste selebra iha loron 03 maiu.
Notísia Relevante: SEKOMS hakarak hasa’e índise liberdade imprensa iha Timor-Leste
Vise Prezidente Komisaun G ne’ebé trata asuntu Edukasaun, Juventude, Kultura no Sidadania inklui Komunikasaun Sosiál iha Parlamentu Nasionál (PN), Gabriel da Costa, hatetem Timor-Leste nia índíse liberdade imprensa di’ak tebes iha rejiaun ÁSIA no mundu, nune’e husu ba jornalista sira atu fó sai informasaun ho kualiade.
“Serbisu imprensa importante tebes, tanba imprensa hanesan fonte ida oinsá atu rekolla informasaun no atu transmite informasaun husi nível baze to’o mai nasionál. Ita haree, Timor-Leste nia índíse liberdade imprensa di’ak iha mundu, maibé presiza haree nia kualidade oinsá atu rekolla informasaun no oinsá prepara informasaun hakerek fila-fali notísia sira no oinsá hatun notísia katak ita foti tuir nia faktu,” nia hateten ba jornalista sira iha resintu Parlamentu, kinta ne’e.
Liberdade imprenda atu la´o di´ak liután, nia kontinua husu ba mídia no jornalista sira Iha Timor-Leste atu fó sai informasaun ho balansu.
“Liberdade imprensa atu la’o di’ak liu-tán, ami iha Parlamentu husu ba mídia no jornalista sira atu foti no hatun notísia tantu iha jornál, televizaun, rádiu no online tenke halo balansu. Tanba mídia ne’e tenke imparsiál no mós indepedente rekolla hodi hatun notísia, la haree parte ida ka parte seluk maibé fó sai ho imparsiál ka balansu,” nia dehan.
Nia dehan, iha Governu Konstitusionál da-sia, iha Sekretáriu Estadu Komunikasaun Sosiál (SEKOMS) ne’ebé mak tutela haree ba komunikasaun sosiál no oinsá fó garantia atu asegura no proteje kona-ba liberdade espresaun no imprensa ba sidadaun sira Iha Timor-Leste.
Entaun, hanesan Komisaun G ne’ebé tutela iha ne’e no Komisaun sente komunikasaun sosiál presiza hametin di’ak liután hodi sidadaun hotu-hotu bele iha aproveitamentu oinsá atu espresa no ko’alia sai situasaun saida de´it ne´ebé sira hasoru.
Tanba ne´e, nia husu SEKOMS atu tau programa prioridade oinsá fó kapasitasaun di’ak liután timoroan ho profisionál nu’udar jornalista atu bele halo kobertura no fó sai informasaun ho kualidade liután.
Deputadu FRETILIN, David Dias Ximenes, konsidera imprensa iha mundu ka sosiedade hotu ne’e atu halo kontrolu sosiál no dezempeña papél importante tebes.
Nia nafatin husu mídia no jornalista TL atu kontinua ho indepedente hato’o informasaun balansu ho faktu no respeita ema-nia dignidade.
Jornalista : Nelson de Sousa
Editór : Cancio Ximenes
