DILI, 03 maiu 2024 (TATOLI)—Asosiasaun Halibur Defisiénsia Matan Timor-Leste (AHDMTL) rekomenda ba Ministériu Edukasaun (ME) hodi fasilita manorin-na’in sira hodi bele hanorin ema ho kondisaun defisiénsia sira iha edukasaun formál.
Diretór Ezekutivu AHDMTL, Gabriel Ponciano de Sousa, hateten, asesibidade ema ho defisiénsia atu asesu ba Eskola Públika sira nakonu ho dezafiu, hanesan fatin, rekursu umanu no finanseiru, liu-liu métodu hanorin mak seidauk di’ak, tanba iha ema ho defisiénsia ho tipu oin-oin.
“Tanba ne’e, ha’u hakarak rekomenda ba Ministériu Edukasaun atubele fasilita manorin sira oinsá hanorin ema ho kondisaun defisiénsia sira, liu-liu la rona no la hatene ko’alia,” Gabriel Ponciano de Sousa, informa ba Agência Tatoli, iha ninia knaar fatin, Manleuana, sesta ne’e.
Notísia relevante : AHDMTL halo abertura formasaun letra braille ba ema ho defisiénsia matan
Nia deskreve, ema ho kondisaun defisiénsia la hatane ko’alia no la rona presiza esplika matéria ho di’ak.
“Ida-ne’e durante sira esforsu hodi buka hatene apreende maibé manorin-na’in sira seidauk iha métodu própria bainihira hanorin,” Diretór Ezekutivu akresenta.
Maski nune’e, AHDMTL nafatin iha espíritu no vontade hodi luta ba ema ho kondisaun defisiénsia sira asesu ba edukasaun formál, nune’e tinan kotuk ema na’in-29 mak asesu ba edukasaun formál maibé iha tinan ne’e besik 50 mak asesu, ne’ebé hatudu progresu natoon.
AHDMTL tinan ne’e fó formasaun letra braille ba ema ho defisiénsia hamutuk 40 maibé daudaun menus rekursu finanseiru.
“Nune’e hato’o ba Ministra Edukasaun, Dulce de Jesus Soares, maibé seidauk fó serteza no dehan sira la disponível hodi apoiu no dehan de’it Ministériu Edukasaun ko’alia lai Ministériu Solidariedade Sosiál no Inkluzaun,” nia haktuir.
Gabriel Ponciano de Sousa konsidera asuntu ne’e loloos ME mak haree tanba liga ho formasaun.
“Maski Ministériu Edukasaun la fó apoiu fundu maibé formasaun la’o ona durante fulan-tolu no ida-ne’e esforsu AHDMTL nian. Ami tenta hela ba ministériu relevante sira, laiha disponibilidade orsamentu maibé nafatin esforsu saida mak ami bele halo hodi bele fasilita ami-nia maluk ho defisiénsia, ami lakohi hamriik iha kotuk no la husik ema ida iha kotuk, nune’e luta nafatin,” nia reforsa.
AHDMTL nia progresu edukasaun ba ema ho defisiénsia tinan ne’e hahú iha mudansa oituan tanba besik ema na’in-50 mak asesu ba edukasaun formál, balun iha Eskola Sekundáriu Nobel da Paz, Eskola Finantil, Eskola Sekundáriu Paulo VI, Eskola Sekundáriu 4 Setembru UNAMET, inklui Cristal ho UNPAZ no na’in-rua iha UNTL.
Jornalista : Osória Marques
Editora : Julia Chatarina
