iklan

COVALIMA, HEADLINE

Autoridade Covalima orienta populasaun hasa’e bandeira RDTL iha uma oin

Autoridade Covalima orienta populasaun hasa’e bandeira RDTL iha uma oin

Populasaun hasa'e bandeira RDTL iha uma oin. Foto/Celestina Teles

COVALIMA, 03 Maiu 2024 (TATOLI) – Antes tama ba Loron Restaurasaun Independénsia Timor-Leste, iha 20 Maiu, autoridade Covalima fó ona instrusaun ba populasaun sira atu dada badeira Repúblika Demokrátika Timor-Leste (RDTL) iha uma oin hodi komemora data ne’e.

Komunidade sira simu ona orientasaun ne’e husi xefe aldeia-sira hodi dada bandeira hahú husi loron 01 to’o 21 Maiu.

“Balun hahú hasa’e bandeira RDTL no balun seidauk, maibé  hanesan timoroan iha obrigatóriu atu kumpre orientasaun  hodi komemora Loron Restaurasaun Independénsia [20 Maiu 2002-20 Maiu 2024]”, abitante Yosep Nunes dehan iha Suai, ohin.

Administradór postu Tilomar, Venâncio Sarmento, dehan Tilomar seidauk iha preparasaun atu hala’o atividade, maibé foin mak orienta ba xefe suku atu informa rezidente ida-idak hasa’e bandeira iha uma-oin.

“Kona-ba atu realiza atividade hodi komemora 20 Maiu ami seidauk simu orientasaun husi munisípiu. Bainhira atu hala’o atividade ruma tenke hatene uluk orsamentu ne’ebé aloka ba postu-sira”, nia dehan.

Orsamentu Jeral Estadu tinan 2024  ba munisípiu Covalima hamutuk millaun $7,3, husi montante ne’e aloka ba postu administrativu hitu hamutuk $601.706 – ba postu Tilomar hamutuk $ 10.964.691.

Prezidente Autoridade Munisípiu Covalima, Miguel Armada Cardoso, fó ona orientasaun ba Sekretáriu Munisipál ba Asuntu Administrasaun no Finansa hodi halo preparasaun atu forma komisaun organizadora.

“Ita seidauk deside atividade saida mak atu hala’o, maibé liuhusi forma komisaun ita foin bele deside, tanba ita hala’o atividade bazeia ba orsamentu, ne’ebé parese sei realiza atividade desportu”, nia adianta.

Ba selebra eventu ne’e, Ministériu Komérsiu no Indústria halo uluk ona, iha 20 Abríl, abertura ba feira hodi komemora data ne’e iha munisípiu Manufahi. Feira ne’e ho tema “Hamutuk ho Dame Promove Produtu Nasionál”.

Aleinde ne’e, Konsellu Ministru mós deside ona selebrasaun aniversáriu ba Restaurasaun Independénsia ba da-22 iha tinan ne’e ho tema “Hametin Instituisaun Estadu Hodi Serbí Povu”. Iha ámbitu komemorasaun ne’e sei ratifika mós adezaun Timor-Leste ba Organizasaun Mundiál Komérsiu (OMK).

Notísia relevante: MKI organiza feira promove produtu lokál iha Covalima

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!