iklan

BOBONARO, HEADLINE, MUNISÍPIU, POLÍTIKA

CNC konsulta programa Filme Hatutan Memória 2024 iha Ritabou

CNC konsulta programa Filme Hatutan Memória 2024 iha Ritabou

Sentru Nasionál Chega, Institutu Públiku, halo atividade konsulta públiku kona-ba programa Filme Hatutan Memória 2024 ba sobrevivente sira iha suku Ritabou, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 03 maiu 2024 (TATOLI)-Sentru Nasionál Chega, Institutu Públiku (CNC,IP, sigla portugés), kinta ne’e konsulta programa Filme Hatutan Memória 2024 iha suku Ritabou, postu administrativu Maliana, munisípiu Bobonaro.

Ofisiál Transmisaun Memoria Interjerasional CNC,IP, Luís Garcia, esplika, objetivu husi atividade ne’e atu rona hanoin husi autoridade postu, líder komunitária, asosiasaun vítima, sobrevivente no Autoridade Muzeu Memoriál Munisípiu Bobonaro kona-ba konsertu hosi Filme Hatutan Memoriál 2024.

Notísia relevante: CNC, I.P sei finaliza uma memória esperansa ba sobrevivente tinan ne’e

“Ita-nia planu asaun anuál 2024 deside Programa Filme Hatutan Memoriál ne’e realiza iha munisípiu Bobonaro iha fatin tolu; ida iha Cailaco, ida iha Ritabou no ida iha suku Holsa,” nia informa ba jornalista sira iha sede suku Ritabou.

Nia hatutan, atividade ne’e kontinuasaun husi konsultasaun ne’ebé halo ona iha postu administrativu Cailaco, kuarta loron (01/05) liubá.

Enkuantu programa ne’e hahú implementa iha tinan 2022 ne’ebé realiza iha munisípiu Liquiçá no 2023 iha munisípiu Covalima.

“Agora ita hakarak realiza iha munisípiu Bobonaro ho ninia objetivu atu hatene sobrevivente sira-nia kondisaun moris, hafoin sira sofre iha funu naruk durante periodu invasaun militár, agora situasaun saida mak sira hasoru. Filme ida-ne’e parte ida atu partilla informasaun no parte ida atu transforma esperiénsia istória direitu umanu ba foin sa’e sira,” nia akresenta.

Xefe suku Ritabou, Maximiano dos Santos Araújo, konsidera filme ne’e importante tebes atubele hatutan istória moruk ne’ebé sobrevivente sira hasoru ba jerasaun foun sira.

“Entaun istória moruk ne’ebé la’o iha 1975 to’o 1999 pelumenus tenke hela ba oan sira, nune’e ba futuru labele lakon, tanba ukun liu hosi prosesu naruk, la’ós ema fó ba ita iha bandeiza,” nia katak.

Líder komunitária ne’e realsa, iha tempu badak sei hatutan informasaun ba sobrevivente sira seluk, atu nune’e bele mai konta istória hodi ekipa CNC bele prodús Filme.

“Sira na’in rasik mak ba fó sira-nia istória hodi ema tau hanesan filmajen ida, tanba ema hotu-hotu mai ho istória la hanesan,” nia katak.

Programa Filme Hatutan Memória hanesan diálogu interjerasionál ne’ebé buka atu kria kondisaun ba aprende transformasaun esperiénsia sira (transformative learning experiences) ba estudante no foinsa’e sira aprende kona-ba istória, direitamente husi sobrevivente sira.

Prosesu implementasaun Filme Hatutan Memória 2024 sei halo kombinasaun diálogu partisipatóriu iha Filmajen (participatory film making) ne’ebé envolve foinsa’e timoroan sira ho sobrvivente sira.

Diálogu ida ne’e atu filma no sei publika iha mídia sosiál sira hanesan Facebook no Youtube no mos sei lori filme ne’e hodi loke iha eskola sira, liuliu iha universidade sira atu estudante sira bele aprende istória.

Enkuantu Programa Filme Hatutan Memória 2024 ne’e realiza tanba kooperasaun entre Centro Chega! ho GIZ– SAUP.

Notísia relevante: CNC, I.P sei harii sentru arkivu foun iha tinan ne’e

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!