iklan

EDUKASAUN, HEADLINE

Konsellu Imprensa aprezenta pontu importante ualu iha Loron Mundiál ba Liberdade Imprensa

Konsellu Imprensa aprezenta pontu importante ualu iha Loron Mundiál ba Liberdade Imprensa

Prezidente Konsellu Imprensa, Oté lio Ote, hamutuk ho membru Konsellu Imprensa hala'o Konferénsia imprensa relasiona ho komemorasaun Loron Mundiál ba Liberdade Imprensa, iha salaun Konsellu Imprensa Dili, sesta (03/05). Imajen Tatoli /Egas Cristovão.

DILI, 03 Maiu 2024 (TATOLI) – Konsellu Imprensa, iha ámbitu komemorasaun Loron Mundiál Liberdade Imprensa no Liberdade Espresaun, foka ba pontu importante ualu atu públiku, ukun-na’in, jornalista, responsavel órgaun komunikasaun sosiál sira hamutuk asegura liberdade imprensa iha Timor-Leste.

Pontu ualu ne’e mak husu ba ukun-na’in sira iha fatin ne’ebé de’it atu kria kondisaun hodi haburas liberdade imprensa no espresaun nu’udar dalan importante atu haburas demokrasia ne’ebé digna; respeita profisaun jornalizmu no mídia iha Timor-Leste ne’ebé asume papél importante nu’udar pilár ida atu hametin demokrasia; ba jornalista no ekipa serbisu redasaun mídia sira atu mantein profisionalizmu hodi hakruuk ba kódigu étika jornalista hodi dignifika profisaun jornalizmu nian.

Pontu esensiál seluk mak enkoraja jornalista no mídia sira atu hametin independénsia no imparsialidade atu públiku labele lakon sira-nia dirietu asesu ba informasaun ho kualidade nu’udar direitu fundamentál ne’ebé konsagra ona iha Konstituisaun RDTL; husu mós ba responsabilidade órgaun komunikasaun sosiál atu kria kondisaun serbisu ne’ebé adekuada ba jornalista sira hodi ezerse sira-nia funsaun, nomós asegura serbisu redasaun ne’ebé independente hodi labele iha intervensaun polítika.

Konsellu Imprensa husu ba Sekretáriu Estadu Komunikasaun Sosiál (SEKOMS) no Sekretáriu Estadu Formasaun Profisionál no Empregu (SEFOPE) atu kria polítika ida di’ak hodi konsidera saláriu mínimu ne’ebé dignu ba jornalista sira; husu ba SEKOMS atu tau prioridade hodi eleva kapasidade rekursu umanu iha setór komunikasaun sosiál, inklui kria lei ka lejizlasaun hirak ne’ebé bele asegura liberdade imprensa no espresaun.

Ikus liu, Konsellu Imprensa apela ba públiku inklui responsavel sira iha instituisaun Estadu nian bainhira iha kazu ruma ligadu ho produtu jornalístiku nian bele opta alternativa hodi rezolve ho dalan mediasaun tuir Lei Komunikasaun Sosiál antes lori bá tribunal nu’udar meiu atu haburas liberdade imprensa.

Membru Konsellu Imprensa, Isabel Fernandes, hateten konsellu ne’e estabelese bazeia ba Lei Komunikasaun Sosiál ho númeru 05/2014 no Dekretu-lei númeru 25/2015, ne’ebé bolu atensaun ba públiku, ukun-na’in, jornalista sira inklui responsavel órgaun komunikasaun sosiál sira hotu atu hamutuk hodi asegura nafatin liberdade imprensa no espresaun ne’ebé konsagra ona iha Konstituisaun RDTL artigu 40 no 41.

Tanba Loron Mundiál ba Liberdade Imprensa ne’ebé proklama ofisiál iha Konsellu Jerál Organizasaun Nasaun Unidas (ONU) iha 1993 bazeia ba rekomendasaun husi enkontru jerál UNIESCO nian iha tinan 1991, konsidera katak loron importante ida ne’e nu’udar instrumentu ba prinsípiu báziku ba liberdade imprensa liga ba pluralizmu no independénsia mídia. Komemorasaun ne’e hanesan mós resposta ida ba importánsia liberdade imprensa iha mundu inklui iha Timor-Leste.

Membru Konsellu Imprensa, Isabel Fernandes.

“Iha tinan ida ne’e, Konsellu Imprensa foti mós pasu konkretu hodi hatán ba tema mundiál loron liberdade imprensa katak Jornalizmu Hasoru Krize Ambientál ne’e sei sai foku diskusaun prinsipál iha Konferénsia Diálogu Internasionál iha Dili ne’ebé sei realiza iha loron 10 Maiu tinan ne’e”, Isabel Fernandes salienta.

Nia relembra katak liberdade imprensa no espresaun iha 2023 konsidera la’o di’ak tebes, ne’ebé haforsa ho relatóriu publikadu husi Repórter Sem Fronteira ne’ebé rekoñese Timor-Leste tama iha kategoria liberdade di’ak hodi okupa númeru 10 husi nasaun 180 sira seluk, maibé país labele orgullu de’it ho númeru sira ne’e no presiza hadi’a parte fraka sira ne’ebé sei eziste hela.

Entretantu, tuir levantamentu ne’ebé halo husi Organizasaun Naun-Governamentál Repórter Sem Fronteira (RSF) iha 2024, liberdade imprensa iha Timor-Leste monu ba pozisaun da-20 husi país 180.

Tanba ne’e jornalista, mídia sira no asosiasaun jornalista sira, inklui Konsellu Imprensa no Estadu iha responsabilidade boot atu hadi’a parte fraka sira atu liberdade imprensa bele sai ezemplu mós iha mundu inklui iha ázia.

Tuir dadus husi Konsellu Imprensa, jornalista sira ne’ebé hetan ona karteira profisionál husi entre 2007 no 2023 hamutuk ema na’in-405, husi númeru ne’e ema na’in-322 ativu hela, ne’ebé kompostu husi jornalista mane 209 no feto 133. Númeru ne’ebé pendente hamutuk 83. Aleinde ne’e, rejista mós mídia ne’ebé eziste iha Timor-Leste hamutuk 48.

Notísia relevante: Expedito: Publikasaun notísia mak ofende entidade sira bele uza direitu resposta

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!