Populasaun lamenta tanba foos kilógrama 25 iha Maucatar sa’e ona ba $19,50
COVALIMA, 03 Maiu 2024 (TATOLI) – Komunidade iha Maucatar lamenta ho folin foos ne’ebé daudaun fa’an iha merkadu, tanba kilógrama (kg) 25 ne’ebé antes ne’e ho de’it presu $16, agora sa’e ona ba $19,50 no kilógrama 20 ne’ebé ho folin $14 aumenta ona ba $18,50, informa administradór postu Maucatar, Laurentino de Jesus.
“Kioske sira fa’an foos 25kg ba $19,50 iha postu Maucatar, tanba sira sosa iha kapitál munisípiu Covalima ho marka Beruang Merah ne’e nia folin $18 no foos 20kg ba $18,50”, autoridade ne’e hateten, ohin.
Ho folin foos ne’ebé aumenta iha postu ne’e mak hamosu preokupasaun ba komunidade tanba sira hetan osan liuhosi fa’an produtu lokál, maibé haree ba kondisaun estrada difikulta sira atu bá fa’an produtu iha merkadu hodi hetan osan hodi sosa foos.
Tanba ne’e, autoridade postu ne’e mós iha ona planu atu orienta ba komunidade presiza halo to’os metru 50×50, nune’e bele hamenus sira-nia susar, se dependente de’it ba sosa foos no bainhira osan laiha sei difísil.
Administradór postu Tilomar,Venâncio Sarmento, reforsa katak folin foos to’o ohin loron seidauk rezolve no sai problema tanba folin laiha mudansa.
Nia rekomenda ba Ministériu Komérsiu no Indústria, liuhusi Sentru Lojístika Nasionál atu halo intervensaun hodi hatún folin foos, nune’e bele ajuda sira.
Bazeia ba rezultadu levantamentu dadus husi funsionáriu Minstériu Komérsiu Indústria, iha 2023, folin foos iha merkadu la normál tanba foos 25kg ho folin antes $12, agora sa’o ona ba $18,50.
Tuir observasaun jornalista nota katak presu nesesidade bázika hanesan foos iha merkadu Debos ho kilógrama 25 ne’ebé antes ne’e $12 aummeta ba $18.
Notísia relevante: Folin foos sa’e to’o $20, autoridade lokál Viqueque husu governu halo intervesaun merkadu
Jornalista: Celestina Teles
Editora: Maria Auxiliadora
