Progresu konstrusaun “Uma nahe biti-boot” atinje ona 27%
DILI, 03 maiu 2024 (TATOLI) – Diretora Nasionál Patrimoniu Lojístika no Infrastrutura, Ministériu Juventude Desportu Arte no Kultura (MJDAK), Maria Luisa Monteiro, informa, daudaun progresu konstrusaun ba “Uma nahe biti-boot” atinje ona 27%.
“Konstrusaun ba “Uma nahe biti-boot” nia progresu atinje ona 27%, maibé Ministériu tenta nafatin ho kompañia, nune’e bele aselera lalais prosesu hotu tuir kontratu,” Diretora ne’e katak ba Agência TATOLI iha edifisiu MJDAK Lecidere-Dili, sesta ne’e.
Uma ne’e harí ho objetivu atu troka uma ne’ebé antes ne’e iha, maibé anin sobu tiha iha tinan 2021 no funsaun husi uma ne’e hanesan salaun boot ida ba MJDAK hodi realiza enkontru no atividade Ministériu nian.
Projetu ne’e konstrui husi empreza internasionál husi nasaun Filipina Rocky Construction ho orsamentu tinan 2024 nian husi MJDAK ho montante $378.372,35.
Tuir kontratu ne’ebé MJDAK selebra ho empreza Rocky ho nia durasaun durante loron 224.
Rekorda fali katak, projetu ne’e hahú iha tinan 2023 iha VIII Governu Konstitusionál, maibé la konsege no iha IX Governu mak loke tenderizasaun no projetu hahú konstrusaun iha fulan-janeiru tinan ne’e.
Jornalista: Hortencio Sanchez
Editór : Florencio Miranda Ximenes
