MANATUTO, 04 maiu 2024 (TATOLI)— Bispo Diocese Baucau, Dom Leandro Maria Alves akompaña husi Monsignor Marco Sprizzi, Reprezentante Vatikan iha Timor-Leste fo bensa ba monumentu Araustos do Evangelho iha Manatuto hodi fo omenajen ba padre no madre sira iha Manatuto ne’ebé dedika sira nia aan ba Timor-Leste durante tempu invasaun.
Iha monumentu refere hakerek mós naran husi amo no padre hamutuk 20 hanesan Padre Martinho da Costa Lopes, Padre Jacob dos Reis e Cunha, Padre Jacob Vicente Dias Ximenes, Padre José Quintão dos Reis, Padre Abilio José Caldas, Padre Áureo José C. Gusmão, Padre Francisco Tavares dos Reis.
Nune’e mos, Padre Mateus Lopes da Cruz, Padre Mariano Soares, Padre Domingos Alves da Costa, Padre Constâncio José C. Gusmão, Madre Domingas Caldas, Madre Margarida Soares, Madre Maria Zulmira Osório Soares, Madre Luisa Maria F. Gusmão, Madre Rosa Sarmento, Madre Maria Filomena Soares, Madre Laura F. Sarmento no Madre Delfina Soares.
Iha inagurasaun no bensa ba monumentu Arautos do Evangelho ne’e inklui mós estatua Coronel St. Antonio no reprezenta mos ho monumentu rua seluk hanesan monumentu munísipal no monumentu Paz e Reconciliação.
“Ita hatene istoria St. Antonio iha Manatuto hanesan padroeira Parokia no iha tempu hanesan devosaun barak mak sarani Manatuto halo ba Coronel St. Antonio. Sarani sira sempre hetan buat ne’ebé mak sira presiza. Agradese ba nai ulun sira ho domin tomak hari imajen St. Antonio iha fatin ida ne’e,” esplika Bispo Leandro durante nia diskursu iha Monumentu Araustos do Evangelho, sabadu ne’e.
Bispo Dioseze Baucau ne’e hare’e monumentu Araustos do Evangelho hodi fo hanoin hikas ba jerasaun foun sira konaba dedikasaun husi relijiosu no relijiosa sira laos deit ba Manatuto maibé ba timoroan hotu.
“Ita agradese hodi hanoin hikas sira ne’ebe fo sira nia aan dedika sira nia aan tomak laos deit ba Manatuto maibe ba timoroan tomak. Ba buat hotu ne’ebe ita halo hamutuk iha ne’e husu sarani sira iha ne’e atu hateke ba ezemplu ba sira laos ba nailulik sira deit maibe mos ba lider istoriku sira tanba sira hanesan ispirador atu inspira ita lori nasaun ba oin,” Nia haktuir.
Bispo ne’e rekoñese atu nasaun ida sai diak presiza kolaborasaun no tulun malu entre timoroan nune’e bele prepara aan diak liu tan, igreja sai diak, nasaun sai diak mak Timor sei diak liu tan.
Iha fatin hanesan Primeiru Ministru, Kay Rala Xanana Gusmão hateten kontribuisaun igreja nian bo’ot tebes ba ukun rasik aan tanba husi igreja mak fasilita oan sira simu edukasaun ne’ebé dignu ba timoroan sira iha tempu kolonializasaun Portugal nian.
“Igreja mak hanorin, governu portugeza ladun tau matan, feto barak hetan edukasaun diak husi madre sira loke asrama, hanesan mos mane sira ho padre sira. Iha tempu Indonezia nian, espesial ba Dom Martino nia ema ida brani tebes,” Nia esplika.
Xefe Governu ne’e husu atu ema hotu labele haluhan partisipasaun igreja nian iha prosesu ukun rasik aan, tenke kaer metin istoria sira hodi aprende basa povu ne’e mak terus, heroi no merese ema hotu nia komprimisiu.
Prezidente Autoridade Munisípiu Manatuto, Lúis Fernandes espresa nia kontente ba finalizasaun husi rehabilitrasaun no konstrusaun ba monumentu sira ne’ebé ikus mai bele sai mós hanesan fatin turizmu religiosu nian ba Manatuto.
“Ita iha monumentu tolu ida konstriui ona iha tempu okupasaun Indonesia, ida seluk reprezenta ita nia heroi sira, ida tan mak Araustos do Evangelho ne’e konstrui husi kedas 2016. Hafoin iha monumentu sira ne’e sei husu nafatin komunidade no ita tinan-tinna konserva nafatin diak atu bele atrai mos turizmu relijiosu sira,” Nia haktuir.
Partisipa iha serimonia ne’e membru governu sira, korpu diplomata, relijiosu, relijiosa, estudante no komunidade husi Munisípiu Manatuto.
Reporter : Cidalia Fátima
Editor : Armandina Moniz
