COVALIMA, 06 Maiu 2024 (TATOLI) – Prezidente Komisaun Organizadora 20 Maiu, Alberto Moniz de Araújo, informa autoridade Covalima aloka rihun $5 hodi finansia atividade ba komemorasaun Loron Restaurasaun Independénsia Timor-Leste ba da-22 (20 Maiu 2002-20 Maiu 2024).
“Ohin, ami forma komisaun organizadora no seksaun 10 atu hala’o atividade hodi prepara ba selebrasaun Loron Restaurasaun Independénsia Timor-Leste iha munisípiu Covalima”, Alberto de Araújo dehan hafoin enkontru hodi estabelese komisaun sira.
Nia dehan seksaun 10 ne’ebé harii ona mak protokolu, programa, konsumu, lojístika, liturjia, limpeza, seguransa, mobilizasaun, monitorizasaun no dokumentasaun ne’ebé kada seksaun lidera husi diretór servisu munisipál, xefe departamentu ho nia funsionáriu sira, nomós sei hala’o tan enkontru ba daruak nune’e kada xefe seksaun aprezenta planu ba orsamentu.
Nia dehan, xefe seksaun sira aprezenta estimativa orsamentál tuir montante osan ne’ebé prevee no kada postu sei aloka $750 hodi hala’o serimónia isár bandeira nasionál iha postu administrativu ne’ebe pertense ba Covalima.
Administradór postu Zumalai, Alípio Magno, realsa katak preparasaun ba 20 Maiu ne’e autoridade postu iha inisiativa atu hala’o atividade anima komunidade sira, maibé depende ba alokasaun verba.
“Haree ba orsamentu, atu hala’o atividade prinsipál mak hasa’e bandeira tanba atu hala’o atividade seluk osan la sufisiénte tanba aloka de’it $750. Nune’e, ami forma ona ekipa buka fundu oinsá mak bele anima komunidade”, dehan.
Tema ba selebrasaun aniversáriu ba Restaurasaun Independénsia ba da-22 iha tinan ne’e mak “Hametin Instituisaun Estadu Hodi Serbí Povu”. Iha ámbitu komemorasaun ne’e sei ratifika mós adezaun Timor-Leste ba Organizasaun Mundiál Komérsiu (OMK).
Notísia relevante: Autoridade Covalima orienta populasaun hasa’e bandeira RDTL iha uma oin
Jornalista: Celestina Teles
Editora: Maria Auxiliadora
