COVALIMA, 06 Maiu 2024 (TATOLI) – Funsionáriu apoiu suku na’in-72 husi postu administrativu Fatululik, Fatumea, Fohorem, Maucatar no Suai asina ona kontratu ho Servisu Munisipál ba Administrasaun no Rekursu Umanu (SMARU) Covalima.
Diretór SMARU, José Manuel Gonçalves, dehan bazeia ba prosesu rekrutamentu funsionáriu apoiu suku iha kada suku na’in-haat, ne’ebé husi postu lima mak asina ona sira-nia kontratu, falta postu Zumalai ho Tilomar hamutuk 48 mak seidauk asina.
“Funsionáriu apoiu suku asina ona sira-nia kontratu ho durasaun fulan ualu hahú loron 01 Maiu to’o 31 dezembru 2024 hafoin ita kontinua renova kontratu iha janeiru-2025, tanba konsidera sira hanesan funsionáriu kazuál”, José Manuel Gonçalves informa, ohin.
Razaun funsionáriu apoiu suku hosi Tilomar seidauk asina kontratu tanba administradór Tilomar sei okupadu no aban mak foin bele asina no hosi postu Zumalai labele asina iha kapitál munisípiu, tanba haree ba udan, nune’e husi munisípiu mak presiza lori kontratu bá postu atu sira bele asina.
Depoizde funsionáriu na’in-120 asina kontratu, Prezidente Autoridade Munisípiu Covalima sei entrega ofisialmente funsionáriu apoiu sira-ne’e ba administradór-sira, nune’e bele hahú hala’o ona serbisu halo atendimentu iha suku 30.
Administradór postu Zumalai , Alípio Magno, dehan prosesu rekrutamentu tama ona iha faze finál no daudaun ne’e pesoál sira asina ona kontratu ho SMARU.
“Postu Zumalai iha suku ualu no funsionáriu apoiu suku hamutuk 32 ne’ebé sira asina de’it iha postu, tanba haree agora tempu udan, nune’e funsionáriu balun labele mai iha munisípiu atu asina kontratu”, salienta.
Notísia relevante: SMARU simu ona lista kandidatu ne’ebé konkorre vaga ba pesoál apoiu suku
Jornalista: Celestina Teles
Editora: Maria Auxiliadora