DILI, 06 maiu 2024 (TATOLI)—Diresaun Nasionál Transporte Terrestre (DNTT), tinan ne’e sei monta sinál ba ema defisiénsia iha fatin tolu hanesan Fatuhada ETDA, Becora Mococo no Mascarinhas, iha kapitál Dili, ne’ebé ninia prosesu daudaun iha ona aprovizionamentu.
“Ita-nia planu fulan-novembru nia rohan tama dezembru tinan ne’e ita bele haree ona nune’e maluk ho defisiénsia sira bele utiliza ona,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, DNTT, Balide, segunda ne’e.
DNTT sei identifika edifísiu ne’ebé ema ho defisiénsia sira asesu barak liu, ne’ebé estabelese besik iha estrada sira.
“Maneira ita monta sinál ne’e, bainhira ema ho defisiénsia sira atu hakat estrada iha ona sinál ba sira atu buti hodi lian, nune’e fó atensaun ba ema sira ne’ebé halo movimentu sei para hodi sira liu,” nia akresenta.
Notísia relevante : DNTT tinan ne’e sei monta sinál ba ema ho defisiénsia iha Dili
Totál orsamentu ne’ebé prevee atu monta sinál ne’e hamutuk rihun $135 resin.
Iha sorin seluk, Diretór Ezekutivu Asosiasaun Defisiénsia Timor-Leste (ADTL), Cesário da Silva, konsidera, infraestrutura ne’e importante tanba durante ne’e asosiasaun foku ba asesibilidade iha Timor-Leste.
“Nu’udar dirijente ba ema ho defisiénsia sente orgullu tebes tanba hatudu katak mudansa boot ba dezenvolvimentu Timor-Leste atu asegura inkluzividade ba ema ho defisiénsia,” nia akresenta.
Cesário da Silva dehan, fasilidade ne’e lori Timor-Leste hahú ona dezenvolvimentu liga ho asesibilidade nian iha fatin hotu, liu-liu estrada públiku tanba bainhira ema ho defisiénsia atu ultrapasa estrada públika sira, dalaruma hasoru difikuldade boot tanba laiha sinál.
“Maibé agora sei iha, ida-ne’e fasilita tebes ba maluk ho defisiénsia sira. Nafatin husu DNTT orsamentu kada tinan nian sempre aloka nafatin monta sinál ba ema ho defisiénsia sira-nian atu monta barak liután iha kapitál Dili hodi fasilita maluk sira,” nia tenik.
Jornalista : Arminda Fonseca
Editora : Julia Chatarina
