iklan

EKONOMIA, DILI, HEADLINE, POLÍTIKA, SAÚDE

Xefe Governu observa direta funsionamentu no konstrusaun pediátria iha HNGV

Xefe Governu observa direta funsionamentu no konstrusaun pediátria iha HNGV

Imajen/Espesial

DILI, 06 maiu 2024 (TATOLI) – Primeiru-Ministru (PM), Kay Rala Xanana Gusmão, segunda ne’e, hala’o vizita hodi observa direta funsionamentu Hospitál Nasionál Guido Valadares (HNGV) no-mós konstrusaun edifísiu pediátria ho kuidadu intensivu.

“Ha’u mai vizita traballu ida, mai la’ós de’it atu haree kona-bá funsionamentu ospitál nian, maibé ita hatene katak, iha ne’e ema moras iha katuas no ferik mak barak tebetebes. Haree ida-ne’e, nune’e ita bele hanoin seluk-tán. Ha’u mós mai haree fatin ne’ebé Xina kontribui hodi harii fatin ida ba pediatria nian ne’ebé sei la’o hela, kala sei lori tinan ida ka tinan ida ho balun tanba bo’ot ho nia medida andar lima,”Xanana katak ba jornalista sira.

Durante vizita,  Xefe Governu preokupa ho problema sira ne’ebé kontinua akontese iha HNGV no husu atu parte ospitál sira ordena no tau prioridade ba área espesializada sira.

“Ha’u-nia preokupasaun bo’ot liu mak, ha’u la’o bá mai iha fatin hotu-hotu, haree problema ran mós barak, problema fuan mós barak inklui problema moras kakorok nian. Husu atu ospitál sira ne’e di’ak liu ita haree ba iha espesializada sira hanesan ida-ne’e ba iha ne’ebá no ida-ne’e ba iha ne’ebá atu labele kahur-malu fali,” Xefe Ezekutivu ne’e afirma.

Molok ne’e, serimónia hatuur fatuk dahuluk ba projetu edifísiu foun pediátria no kuidadu intensivu HNGV hosi Primeiru Ministru (PM), Taur Matan Ruak iha VIII Governu Konstitusionál, iha kinta (26/01/2023) no alokasaun orsamentu millaun $9.3 atu kria kondisaun ida di’ak ba atende pasiente sira.

Edifísiu Pediátria no unidade kuidadu intensivu ne’ebé konstrui daudaun ho nia konstrusaun fízika ne’ebé iha, sei kompleta ho ekipamentu médiku no sala internamentu tuir kondisaun klínika ne’ebé Ministériu Saúde liuhusi HNGV planeia atubele atende kazu krítiku, liuliu ba labarik sira nune’e bele redús númeru morbidade no mortalidade iha HNGV.

Edifísiu ho pezu andar lima ne’e konstrui hosi empreza Cina Civíl Engineering Construction Coorporation (CCECC), no uma halo iha rai ho lu’an 4300 m², sei kompleta ho kama hamutuk 327 ne’ebé sei presiza profisionál saúde hamutuk 81 to’o 163, inklui ona médiku, enfermeiru, parteira no mós espesialista sira.

Notísia relevante:Ai-rin konstrusaun pediatria andar lima hanehan traballadór Xineza lakon vida

Jornalista: Hortencio Sanchez

Editór   : Florencio Miranda Ximenes

iklan
iklan

Leave a Reply

iklan
error: Content is protected !!