DILI, 07 Maiu 2024 (TATOLI) – Sekretaria Estadu Formasaun Profisionál no Empregu (SEFOPE) koloka ona adidu traballadór na’in-rua no asistente adidu ida iha Koreia Súl atu kontrola traballadór timoroan ne’ebé sai ona husi sistema hodi labele influensia traballadór foun sira.
Xefe Gabinete SEFOPE, Jacinto Ribeiro Dias, hateten SEFOPE estabelese ona kooperasaun ho Embaixadór Timor-Leste ba Koreia Súl, Gregório de Sousa, hodi kontrola timoroan sira ne’ebé serbisu ilegál iha nasaun ne’e, inklui sira ne’ebé sei iha sistema laran.
“Ita-nia planu dahuluk mak reforsa kolokasaun adidu ho asistente adidu sira atu kontrola traballadór sira ne’ebé halai sai ona husi sistema, nune’e labele influensia traballadór foun sira ne’ebé prepara atu bá serbisu iha Koreia”, Jacinto Dias reitera iha Caicoli, ohin.
Nia salienta katak, daudaun ne’e Embaixadór Timor-Leste ba Koreia Súl, traballadór timoroan sira ne’ebé mantein iha sistema hamutuk ho adidu sira halo esforsu buka tuir timoroan sira ne’ebé sai ona husi sistema.
Diresaun Nasionál Empregu Esteriór rejista, entre 2009 no janeiru 2024, timoroan hamutuk 5.914 mak hetan ona oportunidade bá serbisu iha Koreia Súl, hosi númeru ne’e fila ona mai Timór 1.046, enkuantu kontinua serbisu 4.822.
Iha fatin hanesan, Diretór Nasionál Empregu Esteriór (DNEE), Joao Pereira, hateten traballadór timoroan ne’ebé halai sai ona husi sistema hamutuk rihun-resin ne’e, Governu sei la tuur nonook, maibé liuhusi SEFOPE iha obrigasaun tomak atu tau mekanizmu ida di’ak hodi kontrola sira.
Notísia relasionada: SEFOPE rejista traballadór timor-oan 1.225 iha Koreia Súl sai hosi sistema
Jornalista: Tomé Amado
Editora: Maria Auxiliadora
