DILI, 04 janeiru 2024 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Estranjeiru (DNEE) rejista traballadór timor-oan hamutuk 1.225 ne’ebé serbisu iha Koreia Súl sai ona hosi sistema.
“Traballadór timor-oan hamutuk 5.868 hetan ona oportunidade bá serbisu iha Koreia Súl hahú hosi tinan 2009 to’o 2023, ne’ebé hosi númeru ne’e iha 1.225 mak sai ona hosi sistema,” Diretór Nasionál Empregu Estranjeiru, João Correia Pereira, informa ba Agência Tatoli, iha ninia knaar fatin, Becora, kinta ne’e.
Notísia relevante : SEFOPE sei kria mekanizmu disiplinár ba traballadór sai hosi sistema
Nia dehan, Governu iha ona planu atu kria mekanizmu disiplinár ba traballadór sira ne’ebé kontinua sai hosi sistema, maibé daudaun ne’e iha prosesu diskusaun nia-laran.
“Mekanizmu disiplinár ne’ebé Governu sei kria la’ós atu prejudika sidadaun ka traballadór sira, maibé ida-ne’e hanesan maneira ida atu eduka traballadór sira labele ses hosi sistema, tanba ses hosi sistema sei fó impaktu ba sira-nia an bainhira hasoru dezastre ruma,” Diretór tenik.
Aleinde ne’e, parte SEFOPE kontinua esforsu fó akonsellamentu ba traballadór sira iha Austrália no Koreia Súl atu labele ses hosi sistema.
SEFOPE haruka ona traballadór hamutuk 780 bá Koreia Súl iha tinan 2023 nia laran, ne’ebé na’in-576 serbisu iha peska no na’in-214 serbisu iha fábrika.
Jornalista : Arminda Fonseca
Editora : Julia Chatarina
