DILI, 07 Maiu 2024 (TATOLI) – Diresaun Nasionál Estensaun no Formasaun Agríkola, Ministériu Agrikultura, Pekuária, Peska no Floresta (MAPPF) indentifika ona katak estensionista hamutuk na’in-60 maka tama ona ba idade reforma.
Diretór Nasionál Estensaun no Formasaun Agríkola, Januário Marçal, hateten estensionista sira ne’ebé rekruta iha 2008 hamutuk 188 no iha 2009 hamutuk 188, inklui sira balun ne’ebé serbisu ona iha tempu Indonézia nian no daudaun balun maka tama ona ba idade avansada.
“Ita iha funsionáriu estensionista hamutuk 60 maka daudaun ne’e iha ona idade entre 58 no 59. Sira ne’e ita konsidera idade avansada no presiza atu hetan konsiderasaun hodi tau ona ba reforma”, Januário Marçal dehan ba Tatoli iha Comoro, ohin.
Diretór ne’e salienta katak atu troka funsionáriu estensionista ne’ebé tama ona idade reforma ne’e presiza halo esforsu liu husi rekrutamentu, nune’e bele garante katak funsionáriu idade reforma sira bele deskansa ona hodi substitui fali ekipa téknika ho idade produtiva hodi halo serbisu agríkola nian.
“Dadus identifikadu hamutuk na’in-60 ne’ebé tama idade reforma ne’e mai husi kada munisípiu no bele tau ona iha konsiderasaun, nune’e bainhira ministériu hahú ona rekrutamentu ba tékniku sira bele bazeia ba dadus sira ne’e hodi koloka tuir kada munisípiu”, realsa.
Januário Marçal mós aprezenta ona dadus sira ne’e iha enkontru ministériu nian kona-ba aprezentasaun planu no atividade tinan 2025 nian. Tanba ne’e, ministériu presiza tau atensaun, nune’e bele responde ba prokupasaun munisípiu sira-nian kona-ba kolokasaun ekipa téknika sira atu apoia to’os-na’in sira.
Antes ne’e, diretór Januário Marçal, informa ona katak Ministériu Agrikultura nia planu atu rekruta tékniku sira hodi reforsa serbisu agrikultura ba hasa’e produsaun hare no batar iha kada munisípiu ne’e sei realiza iha tinan oin, maibé munisípiu sira daudaun ezije aumenta tékniku atu apoia serbisu.
“Ita tau ona iha konsiderasaun atu responde ba iha 2025 kona-ba falta tékniku iha kada munisípiu sira hodi koloka bá suku sira ne’ebé seidauk iha, nune’e sira bele tulun komunidade agrikultór sira hodi hala’o serbisu atu hasa’e produsaun ai-han iha rai-laran”, nia realsa.
Notísia relevante: Agrikultór Aileu husu atu aumenta estensionista na’in-21
Jornalista: Tomé Amado
Editora: Maria Auxiliadora
