DILI, 07 maiu 2024 (TATOLI)–Membru Jerál Konsellu Administrasaun Fundu Espesiál Dezenvolvimentu Ataúro (FEDA) aprova ona projetu tolu ba estrada atu implementa iha Ataúro tinan ne’e.
“Projetu loke estrda tolu ne’e mak hanesan husi aldeia Biti bá Berau suku Macadade nian ho totál kilómetru hitu no loke estrada husi aldeia Arlo to’o Macer suku Beloi nian no kontinua husi aldeia Macer bá aldeia Adara suku Beloi ho totál kilómetru 15,” Diretór Ezekutivu FEDA, Hermes Barros, informa ba Agência Tatoli, iha ninia knaar fatin, FEDA, Praia dos Coceiros, tersa ne’e.
Notísia relevante :Membru Konsellu Jerál husu FEDA revee programa infraestrutura bázika
Orsamentu ba projetu tolu ne’e hamutuk $900.000-resin, ne’ebé daudaun ekipa halo ona koordenasaun téknika ho Prezidente Autoridade Ataúro inklui Intitutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atu halo diskusaun ba implementasaun projetu ne’e.
Projetu ne’e rasik tuir planu sedu liu implementa iha fulan-maiu ou tarde liu iha jullu 2024.
Orsamentu ne’ebé tinan ne’e aloka ba FEDA hamutuk $2.723.606, ne’ebé husi orsamentu ne’e millaun $1-resin aloka ba projetu sira no restu ba servisu operasionál.
Jornalista : Arminda Fonseca
Editora : Julia Chatarina
