Klube Coaches Eleven “lulun” Sousa United FC 3-0
DILI, 07 maiu 2024 (TATOLI)- Ekipa futeból Coaches Eleven, susesu lulun nian adversáriu Sousa United FC ho rezultadu 3-0, ha jogu kontinuasaun kopa Maun Boot Kay Rala Xanana Gusmão ne’ebé realiza iha Estádiu Munisipál Dili, tersa loraik.
Jogu entre ekipa rua la’o manas bainhira minutru primeiru la’o jogadór sira lansa kedan kontra no atake ba malu tuir tékniku no abilidade ekipa idaidak nian.
Kontra atake hirak ne’e laiha ekipa ida mak rezulta golu maske halo atake ne’ebé brillante. Coaches Eleven hatudu jogu ofensivu ka halimar bola ass. Enkuantu ekipa Sousa joga ho ofensivu maibé akompaña mós ho defensivu tanba atake ne’ebé Eleven halo maka’as no jogadór Sousa la konsege antisipa ho di’ak.
Jogu kontinua aguenta minutu ba minutu, adeptu sira iha tribun leten hakilar ho lian makas hodi suporta másimu sira nia ekipa favoritu, nune’e fó esperansa nafatin ba jogadór sira iha kampu laran.
Haree ba forsa ekipa rua nian kuaze hanesan, to’o minutu jogu primeira parte termina laiha ekipa ida mak prodús golu no ekipa rua tenke deskansa ho rezultadu 0-0 hodi hein fali ba faze segundu.
Haka’at ba segunda parte ekipa rua nafatin hatudu jogu ne’ebé ho ritmu makas halo adeptu sira kontente no hakilar maka’as liután.
Jogu la’o to’o minutu 46, jogadór Sousa komete erru hasoru avansadu Eleven to’o ikus árbitru foti kedan desizaun hodi fó penalidade ba Eleven hodi sutu livre. Penalidade ne’e ezekuta husi jogadór, Rofino Walter Gama (67), nune’e lansa sutu tama liu ba rede laran muda keda rezultadu ba 1-0.
Golu ne’e halo jogadór Sousa tenke esforsu maka’as nune’e halo empata jogu ne’e. Maibé esforsu hotu hela de’it hanesan esforsu tanba la rezulta golu.
Eleven halo presaun ne’ebé maka’as, nune’e bele aumenta golu. Esforsu la saugate hatudu duni provas, nune’e iha minutu 48, jogadór João Pedro (29), lansa tan golu ida muda rezultadu nakfilak ba 2-0.
Golu ne’e haterus liután Sousa nia fuan no mentalidade atu hala’o jogu iha kampu laran. Maibé tanba profesionál jogadór sira kontinua hamri’ik metin iha kampu laran ho dignidade nu’udar jogadór hodi aguenta jogu kontra adversáriu.
Eleven lansa atake ne’ebé maka’as ikus iha minutu 59 jogadór, João Pedro hurlele tan golu ida hodi hametin rezultadu ba 3-0. Golu ne’e lori Eleven manán metin jogu ne’e to’o minutu normál termina laiha tan golu ruma, ho nune’e derrota monu ba Sousa nia liman hodi hein fali jogu seluk tuir mai.
Notisia relevante: Kopa Xanana ho vizaun promove joven sira nia talentu
Jornalista: Hortencio Sanchez
Editór : Florencio Miranda Ximenes
