DILI, 02 maiu 2024 (TATOLI) – Primeiru- Ministru (PM), Kay Rala Xanana Gusmão, hatete, kopa Maun Boot Kay Rala Xanana Gumsão (MBKXG) atu promove klube munisípiu no joven sira nia talentu iha mundu futeból.
“Desportu fó oportunidade hadi’a ita-nia talentu iha futeból, objetivu boot kria jogu ne’e atu hametin amizade pás, hametin estabilidade iha ita nia nasaun, promove joven sira nia talentu, nune’e hadia ita nia futeból iha Timor-Leste, klube sira mai husi munisípiu ida ne’e oportunidade ida ba imi,” Xanana hatete iha abertura kopa MBKXG ne’ebé realiza iha Estádiu Munisipál Dili, kinta ne’e.
Lider karismátiku ne’e hatutan, desportu la’ós halo violénsia, maibé desportu atu kria amizade ba malu.
“Ita hahú prepara di’ak liután joven sira nia talentu, atu nune’e ita ba joga iha li’ur bele manán Indonézia no nasaun sira iha ASEAN no ita bele sai mós kampiaun iha jogu ASEAN nian,” espera líder nasionál ne’e.
Nune’e, nia mós husu ba Komisaun Organizadora ba eventu ne’e atu kria mós kampionatu ba feto atu promove mós feto sira nia talentu iha mundu futeból.
“Ita seidauk hahú kampionatu ba feto, ita labele hahú agora maibe hahú nafatin ho munisípiu haat hanesan ne’e uluk lai, atu nune’e promove mós talentu feto sira nian iha futeból,” nia katak.
Alende ne’e, Atuál Primeiru Ministru ne’e agradese ba patrosinadór hotu ne’ebé mak fó apoiu másimu tebes ba eventu ne’e atu promove joven timor nia talentu iha mundu futeból.
Iha fatin hanesan, Prezidente Interinu Federasaun Futeból Timor-Leste (FFTL) Tanente Jenerál Falur Rate Laek husu ba joven sira husi klube 32 ne’e atu hatudu jogu ho di’ak no labele kria violénsia durante jogu.
“Ha’u hein jogu ne’e la’o di’ak atu ita hetan susesu. Bola bele sai kultura iha ita nia le’et, durante jogu labele kria konflitu, lakon ho dignidade manán mós ho dignidade,” Falur dehan.
Komisaun Agradese klube sira
Prezidente Komisaun Organizadora Fliciano P. Ximenes, hatete, jogu ne’e sei la para no kontinua ba nafatin hodi promove joven sira nia talentu.
Nune’e nia husu ba Governu liuliu Ministériu Juventude Desportu Arte no Kultura (MJDAK) atu tau mós prioridade ba jogu ne’e hodi bele tau mós subsídiu hodi fasilita kopa ne’e boot liutan ba oin.
“Agradese ba klube sira hotu ne’ebé mai husi munisípiu fuan boot tebes ba futeból,. Husu MJDAK atu tau subsídiu ba kopa ne’e iha tinan oin, kada tinan eventu ne’e la para, atu nune’e bele fasilita klube sira mai husi dook, atu selu transporte no hola sira nia presiza atu partisipa másimu iha jogu ne’e,” Feliciano katak.
Apoia MJDAK no Patrosinadór
Jogu ne’e hala’o hetan suporta másimu husi patrosinadór hanesan, BRI, Banku Mandiri, Telemor, Assosiasaun Xineza iha Timor-Leste, Virine Unipesoal Lda no Timor Gap.
“Jogu ne’e primeiru lugar sei simu $8,000 osan fó husi BRI, ida ne’e BRI rasik mak entrega ba klube ne’ebé kampiaun. Segudu lugar sei simu $4,500 sei fó husi Telemor sira mak fó direita, terseiru lugar sei simu $3,000 osan sei fó husi Banku Mandiri. Kuartu lugar sei simu osan $2,000 osan fó husi Assosiasaun Xineza Timor-Leste sira mak sei entrega direita, osan ami komisaun la kaer,” Feliciano katak.
Iha jogu ne’e tau mós osan ba mellor markadór hamutuk $600, mellor guarda rede no mellor klube sei simu $500 husi osan ne’e apoiu husi Timor Gap ho montante $1,000. Alende ne’e Delos mós apoiu osan hamutuk $1,000.
Jogu ne’e hetan mós apoiu orsamentu husi MJDAK hodi fó subsidiu ba árbitru ne’ebé dirije jogu no sosa mós materiál lojistika nian balu hodi suporta jogu ne’e durante fulan rua hahú maiu-juñu tinan ne’e.
Klube Buradu FC halakon Relay Laleia FC
Iha jogu abertura loke kedan husi klube rua hanesan Relay Laleia FC no Buradu FC hanesan ekipa ne’ebé joga dala uluk.
Bainhira menutu jogu hahú ekipa rua lansa kedan kontra no atake ba malu tuir tekniku no abilidade ekipa idaidak nian.
Jogu la’o durante menutu 45 nia laran iha oras normál primeira parte nian ekipa Relay ne’ebé identiku ho kamijola kor mean la rezulta golu no ekipa identiku kor metan Buradu mós la marka golu. Nune’e rezultadu tenke hela ho empata 0-0.
Kontinua iha segunda parte ekipa rua hatudu ritmu jogu tuir vontade idaidak nian no forsa makas liu ba Buradu FC nune’e iha menutu 58 jogadór A. Marques (11) konsege lansa sutu uda kona los iha alvu muda kedan rezultadu ba 1-0.
Husi golu ne’e sadik Relay nia emosaun atu halo empata maibé laiha kbiit ikus menutu 90 termina laiha tan golu ruma akontese no rezultadu hela metin ba 1-0. Rezultadu ne’e hatudu Buradu mak iha direitu absoluta ba gaña vitoria no Relay hela ho derrota hodi hein jogu seluk tuir mai.
Iha kopa ne’e klube hamutuk 32 mak kompete, husi númeru ne’e fahe ba grupu A-H kada grupu ida iha klube haat.
Grupu A mak hanesan, Relay FC, Buradu FC, P-Buruma FC, Zhavia FC. Grupu B mak hanesan, Kampung Alor FC, Mulia FC, Bi-Taba FC, Surya Lafaek Haksolok.
Grupu C mak hanesan, Letefoho FC, Naimeco FC, Sousa United, Ciach Eleven. Grupu D mak hanesan, As Catanda, Dark Blue FC, União Fortaleza, Jomar FC. Grupu E mak hanesan, Laivai FC, UEP FC, Aimou FC, Vilavista FC. Grupu F mak hanesan, Lecidere FC, Ostico FC, Hera United FC, Laloran Wekeke. Grupu G mak hanesan Warikoan FC, Assa FC, Irmão Timor FC, Bairro da Paz FC no Grupu H mak hanesan, Daudere United FC, Taibessi FC, Laisorulai FC no Maubale FC.
Jornalista: Hortencio Sanchez
Editór: Florencio Miranda Ximenes
