COVALIMA, 07 Maiu 2024 (TATOLI) – Kondutór no motorista transporte públiku no privada ne’ebé trata karta kondusaun, iha 2019 no 2021, hamutuk 2.921 nafatin uza karta kondusaun privozória imprime ka surat-tahan mutin, tanba seidauk iha orijinál.
Diretór Transporte no Komunikasaun Covalima, Joaquim Gusmão, esplika katak motorista-sira atu hetan karta kondusaun tenke liuhusi teste eskrita, hafoin prátika tama roda mak foin hetan karta kondusaun.
“Tuir regra, motorista-sira uza karta kondusaun provizória durante fulan-neen fó ona karta kondusaun orijinál. Tanba ita iha problema ba mákina imprime no laiha edifísiu permanente to’o ohin loron maka motorista nafatin uza karta kondusaun provizória ne’ebé imprime ho surat-tahan mutin”, Joaquim Gusmão hateten, ohin.
Aleinde laiha mákina imprime ba karta kondusaun, Diresaun Transporte no Komunikasaun mós falta rekursu umanu atu halo atendimentu ba públiku. “Loloos kada seksaun presiza iha funsionáriu ba inspesaun, ba lisensa, ba trata karta kondusaun, halo rejistu ba xapa matríkula lakon no troka xapa ne’e ketaketak”.
Motorista no kondutór ne’ebé uza karta kondusaun privizória 2.921 – ida ne’ebé tuir teste eskrita no prátika iha 2019 hamutuk 1.221 ne’ebé nia dokumentu submete ona ba nasionál no sira ne’ebé tuir teste iha 2021 hamutuk 1.700 ne’e diresaun seidauk submete sira-nia dokumentu ba nasionál, tanba tempu udan hamosu inundasaun iha edifísiu DNTT no labele asegura dokumentu sira.
“Ha’u ko’alia ona Inspetór-Jerál Ministériu Transporte no Komunikasaun atu koordena ho departamentu ne’ebé trata karta kondusaun atu imprime karta kondusaun ba sira ne’ebé daudaun uza privizória”, nia salienta.
Funsionáriu ne’ebé serbisu iha Diresaun Transporte no Komunikasaun Covalima hamutuk na’in-hitu, hosi númeru ne’e permanente ida no kazuál neen. Númeru ne’e la sufisiénte no presiza atu aumenta funsionáriu na’in- 20.
Kondutór Barnabe Ferreira dehan Ministériu Transporte no Komunikasaun presiza atu revolve sira ne’ebé tuir teste ona, maibé to’o ohin loron seidauk hetan karta kondusaun orijinál.“Ida-ne’e ladún di’ak, tanba kle’ur liu ona”, nia ejize.
Nia rekomenda ba Minitériu Transporte bainhira teste hotu ona presiza imprime lalais karta kondusaun no labele iha nasionál mak halo imprensaun, maibé presiza sosa mákina hodi tau iha munisípiu.
Notísia relevante: Edifísiu DTC Covalima laiha kondisaun atu halo serbisu
Jornalista: Celestina Teles
Editora: Maria Auxiliadora
