iklan

EKONOMIA, HEADLINE

Korea Súl iha kompromisu kontinua apoia dezenvolvimentu Timor-Leste

Korea Súl iha kompromisu kontinua apoia dezenvolvimentu Timor-Leste

Ministru Negósius Estranjeirus no Kooperasaun Timor-Leste, Bendito dos Santos Freitas, Imajen Tatoli/António Daciparu

DILI, 07 maiu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas simu vizita kortejia ida husi Enviadu Espesiál Ministériu Negósiu Estranjeiru (MNE) Repúblika Korea, Suh Jeong-in ho delegasaun, hodi diskute kona-ba reforsu kooperasaun bilaterál nasaun rua nian.

Biban ne’e, Ministru Bendito Freitas, konsidera, vizita Enviadu espesiál MNE Korea do Súl mai Timor-Leste ne’e importante tebes, atubele fortifika liután relasaun no kooperasaun bilaterál entre país rua.

“Prezensa delegasaun atu reafirma sira nia apoia ba ita nia dezenvolvimentu, iha setór oioin, iha parte balun ne’ebé enfaze ba Saúde atu dezenvolve infrastrutura ruma iha maternidade, programa nutrisaun no dezenvolvimentu iha komponente lubuk ida, iha edukasaun, dezenvolvimentu lian Korea ho pakote ida ba ita nia traballadór sira ne’ebé ba servisu iha Korea,” Ministru Bendito katak liuhusi nota ne’ebé Agência TATOLI asesu husi media MNEK, ohin.

Durante hasoru malu ne’e parte rua ko’alia mós kona-ba Governu Korea prontu apoiu Timor-Leste nia adezaun ba ASEAN, bainhira hasoru dezafius ruma iha prosesu implementasaun ba roteiru ne’ebé nasaun ASEAN sira fó liu-liu kona-ba área infraestrutura.

Sorin seluk, Enviadu Espesiál MNE Repúblika Korea, Suh Jeong-ing hateten, objetivu prinsipál husi vizita ne’e mak atu konsolida liután relasaun bilateral no hametin nafatin espíritu fraternidade entre Timor-Leste ho Korea súl ba futuru.

“Relasaun bilaterál entre Korea ho Timor-Leste fraternudade metin tebes, tanba Korea uluk hetan invazaun husi nasaun seluk, entaun haree ba Timor-Leste hanesan amigu ida ne’ebé di’ak atu ita bele halo kooperasaun oinsa lori Timor sai hanesan nasaun ida prósperu iha futuru,” enviadu ne’e tenik.

Suh Jeong-in mós kongratula estadu Timor-Leste ne’ebé sai ona membru plenu ba Organizasaun Mundiál Komérsiu (OMK), inklui mós hetan ona estatútu hanesan observadór iha ASEAN.

Maske nune’e, Enviadu Espesiál ne’e afirma, Governu Korea iha esperansa boot ba lideransa Timor-Leste nian hanesan Prezidente Repúblika, José Ramos Horta no Primeiru-Ministru, Kay Rala Xanana Gusmão, tan ne’e sira prontu atu fó apoiu ba Timor iha setór edukasaun no seluk tan.

Notisia relevante: Aselera asaun klimatika ida matak ba TL, MAPPF-AFoCO–Korea Súl asina deklarasaun

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!