DILI 07 maiu 2024 (TATOLI)–Ministériu Adminiatraun Estatál (MAE) liuhusi Diresaun Sektretariadu Tékniku Administrasaun Eleitorál (STAE), tersa ne’e, entrega buletin votu hamutuk 30.400 ba suku lima iha munisípiu Aileu, Dili no Viqueque.
Suku lima husi suku 10 iha munisípiu lima, antes ne’e partisipa iha eleisaun suku iha loron 27 abríl 2024. Nune’e, suku lima sei hakat ba eleisaun segunda volta iha loron 13 maiu.
“Suku lima ne’e mak hanesan suku Lequitura iha postu administrativu Aileu munisípiu Aileu, suku Bebonuk, Maleuana no Madohi iha postu administrativu Aleixo munisípiu Dili no suku Builo iha postu administrativu Ossu munisípiu Viqueque,” Diretór Ezekutivu STAE, Elviro Fernando Moniz, hateten iha ninia diskursu, iha Gráfika Nasionál, Liquintai Taibesi.
Diretór Ezekutivu STAE husu ba ekipa téknika, Komisaun Nasionál Eleisaun (CNE, sigla portugés), parte seguransa munisípiu tolu inklui líder komunitáriu atu akompaña distribuisaun buletin votu ho di’ak to’o destinasaun.
“Hein katak iha loron 11 maiu tenke finaliza nia pakotemente, nune’e iha 12 loron maiu bele halo distribuisaun ba aldeia 31, no iha loron 13 maiu bele realiza eleisaun segunda volta. Tanba ne’e, ha’u husu ba autoridade lokál sira atu hato’o ba ita-nia eleitór sira atu partisipa iha eleisaun segunda volta, nune’e bele hasa’e taxa partisipasaun kompara ho primeira volta liubá,” nia hato’o.
Notísia relevante : STAE hahú imprime buletin votu ba eleisaun suku 10
Totál buletin votu hamutuk 30.400, livru 608 no kada livru iha folla 50, ho kustu impresaun $15.200, ba eleitór hamutuk 27.638 ne’ebé sei partisipa eleisaun.
Suku lima ne’ebé xefe suku eleitu ka manán maioria absoluta tanba liu barreira 50%+1 mak hanesan suku Bocolelo iha postu administrativu Laulara munisípiu Aileu, suku Mantelolão iha postu administrativu Metinaro munisípiu Dili, suku Ailok iha postu administrativu Cristo Rei munisípiu Dili, suku Sikone-Diloli no suku Laicore iha postu administrativu Lacló munisípiu Manatuto.
Nune’e mós, Diretór Jerál Dezenvolvimentu Governasaun Lokál, António Augusto Guterres, husu parte hotu atu kolabora nune’e eleisaun segunda volta la’o ho susesu.
“Ha’u fiar materiál ne’e sei to’o iha aldeia, suku, postu no munisípiu ho di’ak, ne’ebé asegura husi Polísia Nasionál Timor-Leste, akompaña husi STAE no Prezidente Autoridade Munisípiu tolu,” nia tenik.
Diretór CNE munisípiu Viqueque, Honório Crus da Silva, hateten, ekipa téknika sira presiza serbisu ho loloos tuir dekretu-lei suku nian ne’ebé estabele ona.
“Ami munisípiu Viqueque preparadu hodi simu buletin votu ne’e no sei hala’o serbisu ho loloos no onestuhodi bele bele fó susesu ba eleisaun segunda volta,” nia otimista.
Jornalista : Osória Marques
Editora : Julia Chatarina
