DILI, 07 maiu 2024 (TATOLI)–Ministériu Edukasaun (ME) no Institutu Nasionál Formasaun Dosente no Profesionál Edukasaun (INFORDEPE) fó ona formasaun ba profesór hamutuk 1.600 liuhusi projetu Pro-Portugés.
“Formasaun Pro-Portugés agora tama ona ba iha nível B2, sei termina iha fulan-jullu. Partisipante sira-ne’ebé partisipa iha formasaun ne’e hamutuk 1.600. Sira-ne’e maihusi nível Pre-Eskolár, Ensinu Báziku, Sekundáriu Jerál no Tékniku Vokasionál,” Prezidente INFORDEPE, Domingos Martins, informa ba Agência Tatoli, hafoin partisipa iha selebrasaun loron mundiál ho tema “Um Patrimonio Para o Futuro”, iha salaun Ian Martin, Balide, tersa ne’e.
Projetu Pro-Portugés ba formasaun lian portugés posibilidade sei loke ba segunda faze iha tinan ne’e.
“Ita hatene ona to’o ona nível B2, ne’e iha progresu, signifika atu asesu ensinu iha sala laran, ninia kritéria ida maka tenke iha nível B2, ne’ebé ita bele dehan iha progresu ba formasaun Pro-Portugés. Ba futuru sei kontinua nafatin formasaun lian portugés,” nia akresenta.
Notísia relevante : INFORDEPE sei organiza atividade rua ba selebrasaun loron mundiál lian portugés
Iha sorin seluk, Adjuntu Diretór Eskola Ensinu Sekundáriu Jerál (ESJ) 04 Setembru UNAMET iha Balide, Alexandre da Costa, konsidera ME presiza introdús lian portugés iha matéria ba prosesu aprendizajen iha eskola.
“Ami horiseik eskola ne’e realiza selebrasaun loron mundiál ho nia lema importante mak ‘promover lingua portuguesa até a base’, ne’e signifika eskola hahú ona introdús lian portugés iha eskola no eskola ne’e hala’o ona durante eskola ne’e eziste,” nia dehan.
Alexandre da Costa nota, manorin-na’in sira iha problema iha sistema formasaun, nune’e tenke iha modelu formasaun ne’ebé INFORDEPE realiza hodi bele hasa’e koñesimenutu profesór sira,” nia tenik.
Profesór iha Eskola ESJ 04 Setembru kuaze tuir hotu formasaun lian portugés maibé Adjuntu Diretór Eskola husu ba INFORDEPE atu formasaun ne’e bele realiza ba tempu naruk husi fulan-tolu to’o neen, nune’e profesór sira bele foku.
Jornalista : Osória Marques
Editora : Julia Chatarina
