iklan

POLÍTIKA

Membru PN preokupa liberdade imprensa TL monu ba pozisaun da-20

Membru PN preokupa liberdade imprensa TL monu ba pozisaun da-20

Prezidente Komisaun C trata asuntu Finansa Públika iha Parlamentu Nasionál (PN), Deputada Cedelizia dos Santos. Imajen Tatoli/Egas Cristóvão.

DILI, 07 maiu 2024 (TATOLI)-Membru Parlamentu Nasionál (PN), liuhusi deputada bankada CNRT, Cedelísia Farria dos Santos, preokupa Timor-Leste (TL) monu iha ranking liberdade imprensa ne’ebé fó sai husi Repórteres Sem Fronteiras iha loron mundiál Liberdade Imprensa 03 maiu. Husi pozisaun da-10 iha tinan kotuk, país tuun ba da-20, ho pontu 78,92 husi totál nasaun 180.

Notísia relevante:https://tatoli.tl/2024/05/06/liberdade-imprensa-iha-timor-leste-monu-ba-pozisaun-da-20/

“Ranking Timor-Leste nian kona-ba liberdade imprensa devia sa’e, maibé ita tuun fila-fali. Uluk ita iha ranking 10, maibé agora ita tuun kedas ba 20 ne’ebé mak ami preokupa, ita tuir loos liberdade imprensa Timor ne’ebé di’ak ona ne’e ita mantein,’’ Nia levanta liuhusi reuniaun plenária Parlamentu, tersa ne’e.

Tuir nia, tanba kestaun sira ne’e iha Parlamentu mós preokupa tebes no sempre foti ita-nia imparsialidade, transparánsia, nune’e hanoin katak ita fatór balun mak hodi implika ba ita TL ranking liberdade imprensa.

“Husu Governu liuhusi Sekretáriu Estadu Komunikasaun Sosiál (SEKOMS), Konsellu Imprensa, asosiasaun jornalista atu bele haree didi’ak hodi kontrola fila-fali ho didi’ak hahalok ita-nia mídia sira, liuliu bazea ba kódiku étika jornalista nian, ami mós husu se bele fó formasaun ba ita-nia jornalista labele iha nasionál de’it, tempu agora ita iha mudansa se bele sekretáriu Estadu halo planu ba jornalista sira halo estudu komparativu iha ema nasaun iha rai-li’ur hodi bele hetan esperénsia di’ak liu-tán hodi mai implementa fali iha ita-nia nasaun,’’ nia rekomenda.

“La’ós serbisu la di’ak, serbisu di’ak ona, maibé ita presiza mellora di’ak liu-tán, tanba agora ita uza mídia eletróniku iha mundu barak mós observa ita-nia mídia liuhusi mídia online sira, tanba ne’e mak tempu duni ona atu halo kapasitasaun di’ak jornalista sira la’ós iha rai-laran de’it maibé presiza adapta mós nasaun seluk,’’nia hato’o.

Nia mós konsidera notifikasaun husi Ministériu Públiku hodi kriminaliza produtu jornalístiku ida ne’e bele fó impaktu ba ita-nia índise monu.

 “Hanoin ita la tama direta ba ida ne’ebá, karik ida ne’e bele mós sai impaktu tanba se notifika beibeik ema ba keixa notifika, ida-ne’e mós sai impaktu fatór ida kona-ba ranking tuun. Maibé, ha’u seidauk haree to’o Tribunál deside ona jornalista sala, maibé prosesu ne’e la’o no ita konsidera sai mós fatór ida ba ita-nia ranking tuun,’’nia tenik.

Membru órgaun lejislativa ne’e lakoi komentáriu kona-ba iha intervensaun husi polítiku na’in ba mídia sira tanba ladun akompaña didi’ak.

Iha fatin hanesan, Deputada PLP, Maria Angelina Sarmento Lopes, mós preokupa índise liberdade imprensa monu, nune’e enkoraja mídia sira atu hola papél ativu nafatin fó sai informasaun sira inklui violasaun ba liberdade imprensa ho liberdade espresaun, atu nune’e públiku bele akompaña governasaun ida-ne’e ninia lala’ok, pro-ativu hodi ko’alia buat ne’ebé loos no labele hakiduk.

Nia mós husu polítiku sira atu labele halo intervensaun ba redasaun mídia no aseita katak notifikasaun husi Ministériu Públiku kriminaliza produtu jornalístiku sira ne’e mai husi keisa polítiku-na’in; ida-ne’e kontribui mós.

Vise-ministru ba asuntu Parlamentár, Adérito Hugo da Costa, rejista preokupasaun deputadu sira-nia no hodi haree nafatin dezenvolvimentu iha setór komunikasaun sosiál husi progresu sira desde inísiu to’o ohin loron, nível atinjimentu ba prátika di’ak liberdade imprensa ninian ne’ebé  ita kontinua buka atu oinsá tau nia iha pozisaun loloos, serbisu ho profisionál  no kontribui ba dezenvolve ita-nia prinsípiu universál ba Estadu direitu demokrátiku nian.

“Programa Governu da-sia dezeña di’ak tebe-tebes planu sira ne’ebé iha dezenvolvimentu setór komunikasaun sosiál no inklui polítika plataforma dijitál ninian iha setór públiku no privadu sira komesa prienxe vagu ida-ne’e para depois promove Timor-Leste iha mundu globál,’’nia dehan.

Aproveita ho intervensaun deputada sira-nia, Nia hatete, espasu públiku ba promosaun Timor-Leste iha plataforma dijitál espasu ida-ne’e ladun prienxe husi konteúdu lokál katak, obra ne’e fornese husi kompaña mídia sira iha Timor maibé husi parte seluk husi rai seluk mak prienxe hela vagu ida-ne’e. Entaun, Governu haree hela importánsia atu prienxe plataforma dijitál hodi promove Timor-Leste iha globál.

Nune’e rejista tendénsia no fator saida mak índise ne’e tuun husi 10 ba 20.

Notísia relevante:Konsellu Imprensa aprezenta pontu importante ualu iha Loron Mundiál ba Liberdade Imprensa

Jornalista: Nelson de Sousa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!