iklan

EDUKASAUN, HEADLINE

Ministra Edukasaun: “lian portugés hanesan instrumentu dezenvolve labarik no joven nia poténsia”

Ministra Edukasaun: “lian portugés hanesan instrumentu dezenvolve labarik no joven nia poténsia”

Ministra Edukasaun, Dulce de Jesus Soares. Imajen Tatoli/Francisco Sony

DILI, 07 maiu 2024 (TATOLI)—Governu Timor-Leste liuhusi Ministériu Edukasaun (ME) no parseiru sira, tersa ne’e, selebra loron mundiál lian portugés, ho tema ‘Um Património Para o Futuro.’

“Lian portugés iha ita-nia komunidade eskola hanesan instrumentu esensiál ida atu dezenvolve ita-nia labarik no joven sira-nia poténsia no atu harii sosiedade ida-ne’ebé justu, ekuitativu no inkluzivu liu. Tanba razaun ida-ne’e, ha’u hakarak fó agradese ba ema hotu ne’ebé ho dedikasaun no kompromisu bele kontribui ona ba afirmasaun, promosaun no apresiasaun lian portugés iha sira-nia eskola, ho sira-nia estudante sira,” Ministra Edukasaun, Dulce de Jesus, hatetena durante diskursu iha serimónia selebrasaun loron mundiál lian portugés, iha salaun Ian Martin, Balide, tersa ne’e.

Tuir Ministra, manorin sira presiza asegura katak lian portugés nu’udar parte moris no vibrante iha nasaun.

“Ohin ita iha oportunidade atu haree ezemplu di’ak ida kona-ba sira-nia motivasaun no esforsu iha kompetisaun lian portugés ne’ebé hatudu ita-nia kompromisu no serbisu ne’ebé laiha folin atu hametin ita-nia unidade nu’udar parte ida husi komunidade linguístika no kulturál únika no selebra diversidade ne’ebé halo ita sai forte liután hanesan nasaun ida,” nia akresenta.

Notísia relevante : INFORDEPE sei organiza atividade rua ba selebrasaun loron mundiál lian portugés

Ministeriu Edukasaun ho nia kompromisu ba promosaun no valorizasaun lian portugés nian no agradese ba apoiu no kontribuisaun ne’ebé boot husi nasaun irmã no belun sira ne’ebé mai husi tempu naruk hanesan Portugal no Brazíl.

“Hamutuk ita sei kontinua serbisu ho konviksaun hodi kria mundu ida-ne’ebé iha unidade no oin-oin, iha ne’ebé lian portugés sempre iha no sai nu’udar instrumentu ida ba inkluzaun, prosperidade, komprieensaun no kooperasaun. Ha’u hakarak imi hotu iha loron mundiál lian portugés ne’ebé kontente no ha’u hein katak loron ne’e sei fó inspirasaun mai ami atu kontinua serbisu hamutuk hodi dezenvolve Timor-Leste,” governante ne’e tenik.

Iha biban hanesan, Prezidente Institutu Nasionál Formasaun Dosente no Profesionál Edukasaun (INFORDEPE), Domingos Martins, hateten, semana ida-ne’e hanesan semana ba lian portugés, ne’ebé atividade barak mak hala’o ona iha eskola sira iha munisípiu.

“Ohin realiza atividade semináriu ida. Sente kontente tanba iha atividade ida-ne’e marka prezensa husi Primeiru Ministru hodi fó motivasaun no korajen ba lian portugés iha Timor-Leste,” Prezidente INFORDEPE, akresenta.

Promosaun lian portugés

Nune’e mós, Reprezentante Fundu Dezenvolvimentu Kapitál Umanu (FDCH), Moises Soares, hateten, lian portugés ne’e Timor-Leste adota no hakerek iha Konstituisaun hanesan lian ofisiál ida iha nasaun ne’e.

FDCH ne’ebé harii iha tinan 2011 ho objetivu prinsipál atu fó formasaun ba rekursu umanu nasionál iha área estratéjiku dezenvolvimentu nian, hala’o ona papél importante tebes iha konsolidasaun no dezenvolvimentu lian portugés.

FDCH finansia ona kursu formasaun iha lian portugés ba instituisaun estadu oin-oin, liuhusi nia programa formasaun téknika ba funsionáriu públiku sira. Programa ida-ne’e finansia ona kursu lian portugés iha ámbitu formasaun profisionál sira iha setór justisa liuhusi sentru formasaun legál no judisiál Ministériu Justisa no haruka juís sira atu hala’o estájiu profisionál iha instituisaun judisiáriu sira iha Portugal. FDCH mós finansia ona kursu portugés ba diplomata no ofisiál sira seluk iha ministériu asuntu estranjeiru.

“Iha área edukasaun, INFORDEPE sai ona parseiru FDCH nian hodi promove lian portugés. FDCH finansia ona formasaun inisiál no kontinua ba profesór sira, projetu formasaun no daudaun finansia hela projetu Pro-Portugés ba profesór sira iha nível edukasaun hotu-hotu, husi nível primáriu to’o sekundáriu,” nia informa.

Iha ensinu superiór, FDCH finansia ona bolsa estudu ba profesór UNTL sira. To’o ohin loron, finansia ona profesór na’in-196 ne’ebé hetan bolsa estudu ba Brazíl no maioria ba Portugal.

Hahú husi tinan 2021, FDCH oferese ona programa hanorin lian portugés ba profesór sira iha universidade privadu sira no hahú husi tinan 2022 hodi fó bolsa estudu ba profesór sira ne’ebé uza di’ak liu kursu ne’e.

Husi tinan 2022 to’o 2024, FDCH haruka ona profesór hamutuk 79 iha rai-li’ur, profesór hamutuk 44 iha Portugal no universidade hamutuk 35 iha Brazíl.

Aleinde ne’e, Institutu Nasional Administrasaun Publika mós promove ona kursu lian portugés ba funsionáriu públiku sira ho fundu hosi Fundu.

Liuhusi programa bolsa estudu, FDCH iha priviléjiu atu haruka bolsa estudu ba nasaun Komunidade País ho Lian Portugés (CPLP, sigla portugés) sira ne’ebé, aleinde hetan koñesimentu tékniku sientífika mós apreende lian Portugés.

Husi tinan 2011 to’o 2023, FDCH haruka ona bolseiru maizumenus 693 bá Portugal, ne’ebé husi númeru ne’e, bolseiru na’in-324 bá Brazil, bolseiru na’in-49 bá Kabu Verde no bolseiru na’in-35 bá Mosambique atu estuda iha área dezenvolvimentu estratéjiku oin-oin, inklui defeza no seguransa.

“Ezemplu sira-ne’e mak ezemplu balun de’it ne’ebé hatudu papél FDCH nian iha promosaun lian portugés iha ita-nia nasaun. Iha futuru, FDCH sei kontinua haka’as-an atu implementa buat ne’ebé refere iha dekretu-lei foun fundu nian, ne’ebé rekomenda atu fó valór ba formasaun iha lian ofisiál Timor-Leste nian no fó preferénsia atu haruka bolsa estudu husi instituisaun sira bá CPLP,” nia dehan.

Identidade kultura no istória

Primeiru-Ministru (PM), Kay Rala Xanana Gusmão, konsidera lian portugés nu’udar identidade kulturál no istória Timor-Leste nian.

“Lian Portugés nu’udár ita-nia identidade kulturál no istórika. Agradese ba Portugal ne’ebé koloniza Timor-Leste. Bainhira laiha kolonializasaun, portugés durante tinan 500-resin dala ruma ohin loron ita sei nafatin hanesan parte ida husi nasaun Indonézia nian,” PM Xanana hateten iha nia diskursu bainhira partisipa iha selebrasaun loron mundiál lian portugés.

Xefe Governu dehan, Timor-Leste sai nu’udar nasaun independente ida husi metade ilha ida, nune’e mós metade seluk maka enklave tanba mós prezensa hosiportugés sira. Tanba ne’e, Xanana Gusmão konsidera lian Portugés hanesan patrimóniu ida iha nasaun ne’e iha pasadu tanba kolonializmu portugés iha reflexu diferente husi kolonializasaun sira-ne’e hotu.

“Ha’u la haree eskola portugés ne’ebé feita ho portugés hodi hanorin lian portugés, só Igreja Katólika de’it. Sentru formasaun iha altura ne’ebá estabelese iha Soibada, Manatut, hamosu mestre barak. Mestre sira-ne’e espalladu bá instituisaun sira Igreja Katólika nian, espalladu ba fatin oin-oin atu hanorin lian portugés,” Xanana Gusmão tenik.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!