DILI, 08 maiu 2024 (TATOLI)—Centro Nacional Chega, Institutu Públiku (CNC, I.P) finaliza ona uma memória esperansa unidade haat, ne’ebé sei oferese ba sobrevivente konflitu pasadu.
Uma unidade tolu ne’ebé sei entrega ba vítima sobrevivente iha fulan ne’e nia rohan mak iha munisípiu Aileu, ba inan feto ida hanesan vítima violasaun sexuál pasada no ida iha munisípiu Dili.
“Uma unidade haat ne’e, ida finaliza iha tinan kotuk, tolu mak foin finaliza iha tinan ne’e, ninia konstrusaun agora atinje ona 93%, ne’ebé tuir planu fulan ne’e nia rohan ita sei entrega ba sobrevivente konflitu pasadu sira,” Diretór Divizaun Solidaridade Sobrevivente iha CNC, I.P, Nelson Miranda Seixas, informa ba Agência Tatoli, iha ninia knaar fatin, Balide, kuarta ne’e.
Notísia relevante : CNC inaugura “Uma Memória Esperansa” ba vítima Alola iha Covalima
Instititu haree sobrevivente sira-neʼebé sai benefisiáriu ba uma ne’e merese duni tanba atibuisaun ida-ne’e hanesan parte ida husi programa reparasaun ba vítima no sobrevivente sira.
“Ita apoiu ona uma ba sobrevivente hamutuk 15 tinan kotuk 2022 no kontinua apoiu tan ba ema na’in-haat iha tinan 2023, ne’ebé finaliza iha tinan ne’e,” nia akresenta.
Programa uma memória esperasansa ne’e la’o tanba CNC, I.P serbisu hamutuk ho Asosiasaun Vítima hodi fó apoiu uma liuhusi programa reparasaun ba vítima no sobrevivente ba konflitu polítiku ne’ebé mak akontese iha pasadu.
Orsamentu ne’ebé prevee kada tinan atu apoiu uma ba sobrevivente ne’e depende ba ninia kuantidade, desde tinan kotuk 2022 to’o 2023 atribui uma ho medida metru 7×9, kompostu husi kuartu tolu, inklui haris fatin iha laran no dapur iha li’ur.
CNC,I.P tau orsamentu iha tinan 2022, kada uma hetan $14.000 to’o $15.000, maibé ba tinan 2023 ne’e orsamentu tun, entaun uma unidade haat ne’e nia orsamentu hamutuk $50.000, signifika kada uma hetan $12.000 ho nia medida nafatin metru 7×9.
“Ita-nia planu ba tinan ne’e, ita sei apoia tan uma rua ba sobrevivente, maibé ita foku liu ba vítima violasaun seksuál pasada, agora iha planu nia-laran ho nia orsamentu $30.000 tanba kada uma bele to’o $15.000, maibé depende ba uma ne’e halo iha villa ka área rurál, iha liu área rurál bele to’o $15.000 maibé iha villa la to’o $15.000,” nia informa.
Jornalista : Arminda Fonseca
Editora : Julia Chatarina
