iklan

BOBONARO, HEADLINE, MUNISÍPIU, SAÚDE

Estrutura foun Ospital Referénsia Maliana presiza mellora kualidade atendimentu

Estrutura foun Ospital Referénsia Maliana presiza mellora kualidade atendimentu

Prezidente Autoridade Munisipál Bobonaro, Alexandrino Pires, halo enkontru ho ho diretór kompañia lokál sira, kona-ba prosesu implemensaun projetu PDIM. Imajen Tatoli/Sérgio da Cruz.

BOBONARO, 08 maiu 2024 (TATOLI) – Prezidente Autoridade Munisípiu Bobonaro, Alexandrino Pires, tersa ne’e fó hanoin ba estrutura foun Ospitál Referensia Maliana (HRM, sigla portugés) presiza mellora di’ak liután kualidade atendimentu.

Prezidente Autoridade Munisípiu ko’alia asuntu ne’e liuhosi serimónia pose, ne’ebé entrega termu servisu husi Diretór Ezekutivu Sesante, Bourdaloue Fernandes Moniz ho nia estrutura, ba Diretór Ezekutivu foun, José Marcal ho nia estrutura foun ne’ebé hetan nomeasaun husi Ministériu Saúde.

Estrutura kargu diresaun no xefia ne’e implementa tuir organograma estrutura aprova hosi dekretu-lei númeru 11/2012, 29 fevereiru kona-ba Ospitál Servisu Nasionál Saúde.

Alexandrino Pires enkoraja estrutura foun atu mai ho planu no konseitu ne’ebé foun atubele mellora di’ak liután sistema, liuliu kualidade atendimentu nune’e bele fó tratamentu saúde ne’ebé dignu ba pasiente sira.

Tuir nia, estrutura foun ne’ebé nomeadu, maioria ema tuan iha Ospitál Referál Maliana ne’ebé nakonu ho esperiénsia ba espesialidade idak-idak iha área saúde.

Notisia relevante: Governu hahú konstrui edifísiu pediatria-sirurjia homen iha Maliana

“Ba diretór foun no xefe departamentu sira hotu, ne’ebé mak ladi’ak, halo mudansa, ne’ebé di’ak mantein nafatin, halo di’ak liután, kuidadu ho sistema, bainhira mudansa afeta ba ema-nia vida, ne’ebé ha’u husu ba imi atu halo kompromisiu ba imi nia-an, katak sira (pasiente) moras, imi mós moras, sira tanis, imi mós tanis. Ida-ne’e halo ba imi nia-aan atu serbí sira ho fuan,” nia hateten.

Nia dehan, serbisu iha ospitál ukun ne’e la’ós oportunidade, maibé ne’e hanesan misionáriu ba ema-nia vida tomak, tanba iha ospitál laiha kór.

Nia husu ba profisionál saúde sira-ne’ebé haknar-aan iha Ospitál Referál Maliana atu hadi’a maneira atendimentu hodi serbí pasiente ho fuan no domin.

Diretór Ezekutivu nomeadu, José Marcal da Cruz, informa hafoin simu kargu iha 31 abríl liubá, simu mós traballu balun hosi Ministeriu Saúde durante fulan tolu hodi kria planu estratéjiku ba dezenvolvimentu Ospitál Referál Maliana nian.

Atu kumprimenta orientasaun ne’e, Diretór ezekutivu, José Marcal da Cruz, sei esforsu hamutuk Diretór Administrasaun, Finansa no Lojístika, ho kapasidade tomak hodi dezenvolve ospitál ne’e, liuhosi servisu apoia diagnóstika terapeútika laboratóriu tenke funsiona ho di’ak.

“Ita nafatin serbí ita-nia komunidade 24 oras, ita fó solidariedade ba malu, espesialmente asegura vida pasiente,” nia katak.

Eis Diretór Servisu Apoia Diagnóstika Terapeútika ne’e, esplika, iha tempu badak sei kria komisaun instaladora 24 camas ba 105 fazeadamente hahú utiliza sala foun pediatria.

“Horisehik kalan ha’u mai haree, pediatria labarik sira nakonu, labarik 20, inan 20, ha’u husu ba tiha moras ka, dehan la’e ha’u la toba tanba fatin laiha, entaun oan di’ak inan mak moras fali, kama lato’o, tempu badak sei muda labarik sai mai hotu sala foun,” nia katak.

Nia subliña, planu ba oin sei instala mós kamera CCTV iha areador ospitál, nune’e bele fasilita seguransa halo kontrola ba fasilidade no ekipamentu ospitalár.

Estrutura foun ne’ebé lidera husi Diretór Ezekutivu José Marcal da Cruz ne’e komposta husi diretór na’in-tolu hanesan; Venancio Tai Berre asume kargu Diretór Servisu Administrasaun Finansa no Lojístika, Gusmão dos Santos asume kargu Diretór Servisu Asisténsia Klínika, Abel Monteiro asume kargu nu’udar Diretór Apoiu Servisu Diagnóstika Terapeútika.

Nune’e mós Beatriz Santos dos Reis, asume kargu Xefe Gabinete Kontrolu Kualidade no Komunikasaun Sosiál, Rui Soares nu’udar Xefe Departamentu Rekursu Umanu no Estatístika, Balbina Soares nu’udar Xefe Departamentu Administrasaun Finana no Lojístika, Francisco Amaral da Costa, nu’udar Xefe Departamentu Bloku Operasaun no Analista.

Carlos Magno nu’udar Xefe Departamentu Emerjénsia no Servisu Ambulánsia, Miguel Machado Martins nu’udar Xefe Departamentu Pediatria no Medisina interna, Jaaquim Matilde Marques nu’udar Xefe Departamentu Suporta Klíniku, Estela Filhardina Amarál nu’udar Xefe Departamentu Sirurjia no Jinekolojia.

Notisia relevante: Vise MS inaugura sistema purifikasaun Bee LMS iha ospitál Maliana

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!