VIQUEQUE, 08 maiu 2023 (TATOLI)- Husi fulan Janeiru to’o Abríl 2024, Sentru KEmon-B Viqueque, rejista inan isin-rua na’in 121, konsege partu ho komdisaun normál iha Sentru Kuidadu Emerjénsia Obstériku Neonatal Báziku (KEmon-B) munisípiu Viqueque.
Rejista mós inan isin-rua sira ne’ebé partu ho komplikasaun na’in-12 no halo transferénsia ba Hospitál Referál Baucau na’in-26.
Tuir Xefe sentru Saúde postu Viqueque Vila, Celestina Soares, hateten, kona-ba atendementu sentru KEmon-B ba inan isin rua sira-ne’ebé asesu partu totál hamutuk na’in-121, partu ho kumplikasaun hamutuk na’in-12 no halo transférensia ba Hospitál Referál Baucau hamutuk na’in-26.
“Maioria inan isin-rua mak ita nia pesoál saúde sira konsege fó partu. Maske partu ho kondisaun komplikasaun, maibé inan isin-rua sira-ne’e partu tiha, ne’ebé durante trismetre dahuluk ne’e ami salva inan no bebé. Ita mós la rejistu kazu mortalidade durante fulan-tolu nian laran iha KEmon-B”, Xefe Sentru Saúde iha Postu Administrativu Viqueque Vila, Celestina Soares, hateten ba Agência Tatoli, iha ninia kna’ar fatin, ohin.
Kona-ba transferénsia ba Ospitál Referál Baucau, nia dehan, bainhira inan isin-rua ne’ebé partu maka raan sai barak tenke halo transfere tanba Sentru KEmon-B Viqueque seidauk iha ekipamentu atrasis raan inklui operasaun ba inan isin-rua. .
Daudaun, númeru transferénsia komesa ki’ik ona tanba ezistésia Sentru KEmon-B ne’ebé ho pesoál saúde hanesan parteira no médiku sira-ne’e treinadu mak fó atendimentu ba inan isin-rua sira mai husi Sentru Saúde Uatucarbau, Ossu, Uatulari no Lacluta.
Daudaun pesoál saúde liuliu parreira ne’ebé servisu iha Sentru KEmon-B hamutuk na’in-4 no médiku na’in-ida.
Jornalista: Vitorino Lopes da Costa
Editór : Florencio Miranda Ximenes
