Komemora 20 Maiu, PNTL Viqueque fó formasaun ba ekipa korpu isár bandeira
VIQUEQUE, 08 maiu 2023 (TATOLI)- Polísia Nasionál Timor Leste (PNTL) munisípiu Viqueque oferese ona formasaun ba estudante sekundáriu Calixa na’in-93, hodi sai korpu korpu isár bandeira iha loron komemorasaun 20 Maiu ba dala-22.
“Ami fó ona formasaun parada nian kuaze semana ida ona ba ita-nia estudante sira atubele sai korpu isár Bandeira Nasionál ho di’ak iha loron Restaurasaun Independénsia iha 20 Maiu ne’e”, Komandante PNTL munisípiu Viqueque, Superintendente António Rego Fernandes, relata ba Agéncia Tatoli, iha kuartel PNTL Viqueque, ohin
Komadante PNTL Viqueque ne’e hatutan, ba komemorasaun Restaurasaun 20 Maiu ne’ebé realiza iha munisípiu Viqueque eskola sekundáriu Calixa maka sai ekipa korpu parada.
“Ami eskola estudante hamutuk na’in-93 maka agora dadauk iha hela formasaun, maibé husi númeru ne’e sei redús ba 51 nu’udar ekipa prinsipál iha ámbitu komemorasaun. Ha’u fiar katak ba preparasaun isar bandeira 20 Maiu sei la’o di’ak bazeia ba formasaun sira-ne’ebé PNTL oferese”, katak nia.
Enkuantu ekipa isar bandeira ba loron 20 Maiu komisaun organizadora sei prepara mós sertifikadu ba estudante sira-ne’ebé sai korpu isár bandeira.
Tuir obserbasaun jornalisra Agência Tatoli iha fatin formasaun kampu futeból demokrásia, postu Viqueque nota katak maske loron manas, maibé estudante sira ho vontade hala’o prátika parada iha kampu, ne’ebé hetan mós akompaña husi segundu komadante PNTL munisípiu Viqueque inklui formadór na’in tolu.
Notísia relevante: PAM Viqueque prevee rihun $13 hodi selebra loron Restaurasaun Independénsia
Jornalista: Vitorino Lopes da Costa
Editór : Florencio Miranda Ximenes
