iklan

HEADLINE, KAPITÁL

SEKOMS no KI sei esforsu hamutuk eleva index liberdade imprensa

SEKOMS no KI sei esforsu hamutuk eleva index liberdade imprensa

Sekretáriu Estadu Komunikasaun Sosiál, Expedito Dias Ximenes. Imajen Tatoli/Francisco Sony

DILI, 08 maiu 2024 (TATOLI)—Sekretaria Estadu Komunikasaun Sosiál (SEKOMS) sei serbisu hamutuk ho Konsellu Imprensa (KI) inklui asosiasaun jornalista sira atu halo kampaña kona-ba lei komunikasaun sosiál ba públiku no etidade Estadu sira hodi eleva filafali index liberdade imprensa Timor-Leste ne’ebé tinan ne’e tun ba 20.

“Ita sei halo esforsu hamutuk ho KI no asosiasaun jornalista sira hodi halo kampaña sosiál atu sosializa lei komunikasaun sosiál hodi entidade hotu bele kompreende lei komunikasaun sosiál, nune’e ita bele eleva fali ita-nia index liberdade imprensa sa’e fali iha tinan 2025,” Sekretáriu Estadu Asuntu Komunikasaun Sosiál, Expedito Dias Ximenes, hateten, iha salaun Gabinete SEKOMS, Palásiu Governu, kuarta ne’e.

Nia nota, index liberdade imprensa Timor-Leste nia tun tanba dalabarak públiku seidauk hatene serbisu jornalista, tanba iha tinan 2023 rejista iha kazu balun ne’ebé ameasa serbisu jornalista sira, hanesan hetan notifikasaun atu responde iha Ministériu Públiku no dalaruma produtu jornalístiku balun la fó satisfasaun ba entidade sira hodi hetan kriminalizasaun.

Notísia relevante : PPN husu hadi’a indikadór ne’ebé kontribui TL nia liberdade imprensa

Tanba ne’e maka jornalista sira sente ladun seguru atu hala’o sira-nia serbisu nune’e afeta ba index liberdade imprensa tun.

Lei komunikasaun sosiál iha artigu sira fó dalan bainhira públiku, entidade Estadu, ka figura públiku balun sente informasaun balun ne’ebé jornalista fó sai husi mídia ladun favorese, regra ne’e labele kriminaliza maibé produtu jornalístiku tenke rezolve tuir lei komunikasaun sosiál.

Aleinde ne’e, lei komunikasaun sosiál sai baze ba jornalista no entidade hodi hatene, nune’e bainhira iha sala ruma halo direitu resposta labele kriminaliza kedas jornalista ba Ministériu Públiku.

Mídia pilár importante ba demokrasia

Sekretáriu Estadu dehan, atu serbisu ne’e bele la’o ho di’ak, SEKOMS labele serbisu mesak maibé hamutuk ho entidade relevante sira ne’ebé iha relasaun ho komunikasaun sosiál inklui instituisaun judisiál sira atubele serbisu hamutuk atu kompreende di’ak liután saida mak presiza halo iha tinan ida-ne’e nia-laran atu eleva fali index liberdade imprensa iha tinan oin.

“Ita ko’alia kona-ba liberdade imprensa no demokrasia, mídia mak pilár importante iha demokrasia, nune’e ita ko’alia kona-ba liberdade imprensa tun, signifika ita bele hateten katak ita-nia liberdade imprensa tun ne’e hatudu ita-nia demokrasia mós tun,” nia hateten.

Nune’e, biban ne’e, nia husu ba entidade relevante no jornalista hotu atu nafatin respeita kódigu étika jornalizmu nian tanba étika jornalista nian mak sai hanesan biblia, tanba ne’e presiza buka atubele kompreende.

“Timor-Letse nia index liberdade imprensa tun ne’e la’ós ohin halo análiza foti kedas rezultadu maibé rezultadu tun ba pozisaun 20 ne’e fó sai husi Repórteres Sem Fronteiras (RSF). Situasaun ida-ne’e husu ita hotu nia atensaun, liu-liu instituisaun mídia sira tantu Governu nomós instituisaun Estadu sira ne’ebé iha relasaun ho komunikasaun sosiál no informasaun mídia, tanba avaliasaun ne’ebé halo husi RSF ne’e halo iha loron 03 maiu iha Síria kada tinan, halo avaliasaun ba liberdade imprensa ba nasaun 180 iha mundu hodi bele hatene kona-ba to’o iha ne’ebé index liberdade imprensa nasaun idaidak nian,” Expedito relata.

Indikadór lima

Timor-Leste nia index liberdade imprensa  iha tinan 2021 iha pozisaun 71 no tinan 2022 iha  númeru 17 no tinan 2023 iha pozisaun 10, maibé tinan 2024 tun liubá pozisaun 20.

Avaliasaun ne’e la halo semana ida ka fulan ida, maibé avaliasaun ne’e RSF halo husi maiu 2023 to’o abril 2024.

Saida mak influénsia ba avaliasaun ne’e ho ninia indikadór lima mak haree husi lejislasaun, aspetu polítiku, sosiál, ekonomia no seguransa. Husi indikadór lima ne’e iha indikadór balun ne’ebé Timor-Leste hetan pontu ne’e sa’e hanesan indikadór seguransa, ekonomia  maibé iha indikadór sosiál, polítiku no lejislasaun tun.

“Husi totál indikadór avaliasaun lima ne’e mak ita hetan númeru 20, ida-ne’e atu hateten iha parte lejislasaun ita presiza hadi’a sujestaun balun ne’ebé afeta ba liberdade imprensa, signifika sira ne’ebé toma konta lejislasaun ne’e mak Governu no Parlamentu Nasionál. Tanba ne’e IX Governu nia mandatu fó ona atensaun atu revee filafali artigu balu lei komunikasaun sosiál nomós atu haree dekretu lei 42/2008 kona-ba RTTL,E.P nian” membru Governu ne’e tenik.

Nia dehan, RTTL, E.P hanesan empreza públika maibé nia mós halo funsaun hanesan mídia públiku ne’ebé presiza haree, tanba ne’e SEKOMS sei haree mós lei sibernétika no lei rádiudifuzaun ne’ebé iha lejislatura anteriór lei ne’e kaduka ona.

Labele halo intervensaun serbisu editoriál

Biban ne’e, Sekretáriu Estadu Komunikasaun Sosiál, Expedito Dias Ximenes, afirma, membru Governu labele halo intervensaun ba serbisu editoriál mídia Estadu no privadu.

“Intervensaun iha kontestu polítika editoriál laiha membru Governu ida halo intervensaun, ha’u sempre ko’alia iha Konsellu Ministru katak membru Governu tenke sai fonte prinsipál bainhira jornalista sira atu halo klarifikasaun ruma,” Expedito akresenta.

Nia klarifika, nunka halo intervensaun polítika ba mídia estatál hanesan RTTL, E.P no Agência Tatoli, I.P maibé fó de’it orientasaun ba jerente mídia ne’ebé tutela ba SEKOMS hodi orienta falo jornalista sira halo notísia bazeia ba kódigu étika jornalizmu no labele halo notísia konfuzaun.

“Governu agora no anteriór sira mós hanesan, sempre fó orientasaun ba instituisaun ne’ebé tutela ba sira atu labele halo notísia ne’ebé kria konfuzaun iha públiku ne’e normál, tanba intervensaun ne’e bainhira membru Governu ne’e to’o ba hasai tiha notisia ne’ebé mídia hakerek ne’e, tau tuir fali membru Governu nia hanoin, ida-ne’e mak bolu intervensaun,” nia tenik.

Sekretáriu Estadu admite katak sempre halo vizita ba RTTL,E.P no Agência Tatoli, I.P kada fulan hodi fó orientasaun serbisu no fahe informasaun bazeia ba faktu ne’ebé iha.

“Ida-ne’e hau-nia serbisu, tanba instituisaun rua ne’e tutela ba ha’u maibé la halo intervensaun editoriál,” nia afirma.

Governante ne’e mós husu ba mídia privadu atu evita intervensaun ekonomia, katak mídia na’in labele halo intervensaun ba serbisu redasaun ka editoriál.

“Ha’u hein katak midia na’in bele respeita ba kódigu étika jornalizmu nian, tanba laiha dalan ba ema poder polítiku no ekonómiku atu halo intervensaun iha polítika editoriál. Tanba mídia hotu iha imparsialidade no indepedénsia ba sira-nia editoriál, ne’ebé laiha dalan ba membru Governu sira halo intervensaun,” nia salienta.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!