DILI, 09 maiu 2024 (TATOLI)—Ekipa ne’ebé lidera husi Sekretaria Estadu Asuntu Toponímia no Organizasaun Urbana (SEATOU), kinta ne’e, halo diálogu ho komunidade iha aldeia Ai-mutin, suku Comoro, postu administrativu Dom Aleixo, munisípiu Dili, relasiona ho planu atu halo alargamentu ba estrada.Estrada ne’ebé atu dezenvolve husi dirasaun Elemloi tuun bá estrada boot Sede Komité Sentrál FRETILIN (CCF) oin, ho naruk metru 326.
Xefe aldeia Ai-mutin, Celetiano Luís Pereira, hateten, diálogu ne’e hodi hamutuk ho komunidade buka solusaun ba rai ne’ébe sei uza halo alargamentu ba estrada.
“Husu parte hotu nia kompreensaun.Ha’u nu’udar líder komunitáriu hamutuk ho ha’u-nia komunidade koopera ho Governu hodi halo dezenvolvimentu ba rai ne’e, maibé ha’u-nia komunidade sei hato’o sira-nia preokupasaun relasiona ho sira-nia rai ne’ebé sei uza ba dezenvolvimentu,” Celetiano Luis Pereira, hateten durante diálogu iha Ai-mutin.
Notísia relevante : SEATOU sobu barraka negosiante iha Ai-mutin no muda bá Merkadu Manleuana
Iha fatin hanesan, Administradór postu Dom Aleixo, José Soares, reforsa, atividade ne’e hodi fahe informasaun ba komunidade afetadu dezenvolvimentu, nune’e husu hotu-hotu koopera hodi bele buka solusaun.
“Ita mai halo diálogu ho SEATOU hodi rona esplikasaun ruma husi ekipa, nune’e husu komunidade rona tiha esplikasaun, karik iha lamentasaun ruma kona-ba mudansa sira ne’ebé iha bele hato’o ho kalma hodi buka solusaun, tanba buat ne’ebé espasu públiku ita presiza hadi’a, ohin loron ema insulta serbisu Governu nian maibé bainhira buat sira hotu la’o di’ak, iha futuru ita-nia oan sira mak sei goja,” nia akresenta.
Nune’e mós, Komandante Polísia Nasionál Timor-Leste (PNTL) Eskuadra Dom Aleixo, Inspetór Xefe Polísia, Alex Samurai, hateten, nu’udar seguransa sira-nia parte hamutuk ho ekipa SEATOU hodi asegura situasaun iha terrenu.
“Ami-nia parte halo seguransa ba atividade ne’ebé ekipa SEATOU halo, nune’e husu ita hotu nia apoia no koopera malu iha serbisu hotu,” nia hameno.
Komunidade hakarak koopera maibé tenke iha solusaun
Iha diálogu ne’e, abitante afetadu, Olinda da Silva, konkorda no apoia ho programa Governu nian hodi halo dezenvolvimentu ba rai ne’e.
“Ami koopera maibé Governu tenke rekoñese mós ba ami-nia sasán sira ne’ebé iha, liu-liu ai-horis sira,” nia akresenta.
Abitante, Eliza Fernandes, dehan, sira-nia uma kona fatin ne’ebé atu halo alargamentu estrada, nune’e sira koopera hodi oferese rai metru rua ba Governu halo estrada, maibé husu atu konsidera sasán sira ne’ebé kona impaktu dezenvolvimentu.
“Ami-nia uma sei kona maibé oinsá nia solusaun hetan indenizasaun ka lae, tanba ami apoiu totál ba serbisu ekipa SEATOU,” nia akresenta.
Hatan ba preokupasaun sira ne’e, Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, ekipa sei haree preokupasaun sira husi komunidade maibé presiza koopera ho Governu nune’e dezenvolvimentu bele la’o.
“Ha’u husu ba inan aman no família sira ne’ebé sei afeta ba alargamentu estrada ne’e, ekipa sei mai kompletu foti imi-nia dadus, hahú husi morru, rai, ai-horis no sasán seluk tan ne’ebé ezemplu rai metru rua $2 tenke tau kedas bainhira ekipa mai liu-liu Ministériu Obra Públika (MOP) hato’o dadus loloos, nune’e sira bele foti atu fó osan rahun ruma karik tenke ho dadus kompletu hodi fasilita ekipa hala’o nia serbisu,” Germano fó hanoin.
SEATOU mai ho ekipa konjunta, ne’ebé ekipa balun mak foti dadus no balun halo libertasaun fatin.
“Ita atu halo dezenvolvimentu pasiénsia tenke lakon sasán balun, maibé ida-ne’e la’os SEATOU nia programa maibé IX Governu nia programa ne’ebé kontinua planu programa sira ne’ebé Governu sesante sira la halo hotu, ita mai kontinua dezenvolve ita-nia rai,” nia informa.
Iha fatin hanesan, Diretór Jerál Estada Ponte Prevensaun no Kontrolu Cheia husi MOP, Nene Lobato, hateten, molok ekipa mobiliza ekipamentu halo liberasaun rai, sei halo survey no tau sinál ruma iha fatin ne’ebé atu dezenvolve.
“Ita sei tuur hamutuk molok atu sobu, konkorda ona ho rezultadu levantamentu dadus ne’ebé ami halo mak foin mai sobu, ne’ebé bainhira atu mai ami sei fó informasaun liuhusi líder komunitáriu,” nia tenik.
Ekipa téknika husi empreza responsável obra, Dili United hahú leno sopo (GPS) atu hatene kuantidade uma no barraka ne’ebé afetadu tanba estrada liman loos no liman karuk sei foti metru rua.
Jornalista : Arminda Fonseca
Edirora : Julia Chatarina
