Empreza Tim Estura normaliza ona ponte Metauai ne’ebé kotu iha Uatucarbau
VIQUEQUE, 09 maiu 2024 (TATOLI)-Empreza Tim Estura Unipesoal Lda, halo ona nomalizasaun ba ponte Metauai diresaun postu Uatucarbau, munisípiu Viqueque ne’ebé kotu iha semana kotuk.
Akontese udan-boot iha loron sabádu (04/05), rezulta ponte Metauai diresaun Uatucarbau ba munisipiu Viqueque kotu totál hodi difikulta movimentu ema no transporte ba mai durante loron-haat nian laran.
Notísia relevante:Ponte Metauai Uatucarbau kotu difikulta movimentu ema no transporte
“Nune’e horiseik lokoraik maka ita-nia empreza ne’ebé halo servisu estrada iha postu Uatucarbau mak ba halo tiha normalizasaun, maibé iha ponte hun ne’e maka laiha protesaun ne’ebé tempu udan posiblidade bele sobu tan”, Administrador Postu Administrativu Uatucarbau, Anacleto Doutel Sarmento, hateten ba Agéncia Tatoli, via telefonika, ohin.
Nune’e, nia afirma presiza konstroi morru protesaun ka barajen atu proteje ponte referidu bainhira udan tuun halo mota boot.
Ho normalizasaun ne’e, nia dehan movimentu ema ho transporte públiku hahú husi horiseik lokoraik to’o mai agora la’o normal fali ona.
“Ami agradese ba empreza ne’ebé disponivel ba halo ona normalizasaun ponte ne’e hodi fasilita ita-nia movimentu ema no transporte husi Uatucarbau bá munisípiu Viqueque”, nia agradese.
Notísia relevante:Ponte Sumaku kotu difikulta Sentru Saúde Lacluta transfere pasiente bá Viqueque
Jornalista: Vitorino Lopes da Costa
Editór : Florencio Miranda Ximenes
