iklan

HEADLINE, SAÚDE

INFPM distribui kada loron oksijéniu litru 100 ba HNGV

INFPM distribui kada loron oksijéniu litru 100 ba HNGV

Silindru oksijéniu hamutuk 84 ne’ebé Governu Austrália liu hosi Department of Foreign Affairs and Trade (DFAT) oferese ba Serbisu Autónomu Medikamentu no Ekipamentu Saúde (SAMES). Imajen Tatoli/Felicidade Ximenes.

DILI, 09 Maiu 2024 (TATOLI) – Institutu Nasionál Farmasia no Produtu Medikamentu (INFPM) distribui loroloron oksijénisu litru 100 ba Ospitál Nasionál Guido Valadares (HNGV), informa Diretór Distribuisaun INFPM, Krizanto Monteiro.

Tuir previzaun, distribuisaun oksijéniu ba iha HNGV kada fulan bele atinje to’o rihun tolu la konta ho distribuisaun ba iha ospital referénsia sira.

“Barak liu presiza loos mak ospitál nasionál. Kada loron botil 100 tenke ba. HNGV iha nesesidade uza oksijéniu entre litru 100 no 120, tanba pasiente sira ho problema respiratóriu no labele ona ko’alia presiza”, Krizanto Monteiro dehan ba Tatoli, iha Kampung Alor.

Ba ospitál rejionál no referénsia sira INFPM haruka oksijéniu kada fulan litru 100, maibé kuandu iha pedidu urjente institutu responde kedan.

Iha sorin seluk, Diretór Servisu Apoiu Diagnóstiku no Terapéutiku, Ospitál Nasionál Guido Valadares, Vidal de Jesus Lopes, informa HNGV simu pasiente loroloron entre 800 no 1.000.

Diretór ne’e realsa tan katak demanda HNGV boot tebes ba fahe ai-moruk ba pasiente sira, tanba iha kama 400 ne’e nakonu loroloron.

“Entaun ai-moruk sira mai ne’e distribui no hotu lalais. Ita seidauk sura ho pasiente sira ne’ebé mai halo kontrolu”, nia relata.

Notísia relevante: HNGV falta stock ai-moruk 20%

Jornalista: Jesuína Xavier

Editor: Maria Auxiliadora

iklan
iklan

Leave a Reply

iklan
error: Content is protected !!