iklan

EKONOMIA, BOBONARO, HEADLINE, MUNISÍPIU

Líder komunitária husu Governu rezolve kondisaun estrada Zuloil-Lolotoe

Líder komunitária husu Governu rezolve kondisaun estrada Zuloil-Lolotoe

Kondisaun estrada iha postu administrativu Lolotoe, munisípiu Bobonaro ne'ebé hetan estragu hosi dezastre naturál hafoin akontese udan-boot foin lalais ne'e. Imajen espesiál.

BOBONARO, 09 maiu 2024 (TATOLI)-Líder komunitária no komunidade sira husu Governu atu halo intervensaun lalais hodi rezolve kondisaun estrada iha área Zulo-il, suku Lontas, postu administrativu Lolotoe, munisípiu Bobonaro ne’ebé hetan estragus totál husi erozaun hafoin akontese udan-boot iha fulan kotuk.

Xefe suku Opa, postu administrativu Lolotoe, Moisés da Costa, esplika, kondisaun estrada ne’e difikulta tebes ba movimentu komunidade husi postu administrativu Lolotoe Vila ba postu administrativu Bobonaro no kapitál Maliana.

Notísia relevante: DSMOP submete ona pedidu ba IGEADI normaliza estrada Lolotoe

“Agora daudaun situasaun iha fatin ne’ebá, estrada hetan estragus durante fulan ida ona, to’o agora seidauk hadi’a, sirkulasaun agora paradu, motor mos ita presiza hulan de’it, karreta labele liu, uza trasaun mos araska, tanba rai dodok iha okos, tanba ne’e ami rekomenda ba governu atu tau matan ba estrada ne’e ho sériu,” nia ko’alia iha Maliana, kinta ne’e.

Lider komunitária ne’e haklaken, problema ne’e afeta atividade ekonomia komunidade nian inklui atu partisipa iha komemorasaun loron restaurasaun independénsia ba dala-22 ne’ebé realiza iha postu administrativu Lolotoe Vila.

Tuir nia, bainhira governu la halo intervensaun, ba oin estrada refere bele hetan estragus grave liután,ntanba situasaun klima iha Lolotoe udan hela.

“Ami postu Lolotoe labele halo movimentu, lori produtu lokál ba merkadu, tanba dalan ne’e alternativu, ami atu lori fali ba Suai mos la di’ak, tanba estrada husi parte rua ne’e aat hotu,” Xefe suku Moises hateten.

Ediquito Belo nu’udar abitante lokál, reforsa kondisaun estrada referida grave, tanba ne’e nia rekomenda ba Institutu Jestaun Ekipamentu Apoia Dezenvolvimentu Infraestrututa, Institutu Públiku atu halo intervensaun imediata hodi fasilita movimentasaun transporte públiku no privada.

“Ami rona dehan Obra Públika munisípiu Bobonaro hatama ona karta ba IGE, maibé la hatene agora tanba saida mak seidauk hadi’a,” nia preokupa.

Enkuantu iha loron 02 fulan-maiu ne’e Diresaun Servisu Munisipál Obra Públika Munisípiu Bobonaro submete ona karta ba IGEADI,IP atu halo normalizasaun urjénsia ba estrada ne’e.

Planu DSMOP munisípiu Bobonaro katak hafoin halo normalizasaun estrada ezistente, kontinua hetan estragus, maka sei buka alternativu seluk hodi muda trosu ba fatin seluk.

Portantu tinan kotuk, iha mandatu Administradór postu administrativu Lolotoe sesante halibur ona lia-nain sira halo ona serimónia kulturál iha estrada ne’e atu muda fali ba fatin seluk.

Tuir dadus, postu administrativu Loloto’e iha suku hitu, aldeia 20 ho totál populasaun 7,695 no xefe família 1,591.

Notísia relevante: Rai halai rezulta estrada Ozo Liga ba postu Lolotoe no Covalima grave

Jornalista: Sérgio da Cruz
Editór:Evaristo Soares Martins

iklan
iklan

Leave a Reply

iklan
error: Content is protected !!