iklan

BOBONARO, LEI, MUNISÍPIU

AMB alerta hadook animál hosi estrada públiku Balibo-Atabae

AMB alerta hadook animál hosi estrada públiku Balibo-Atabae

Prezidente Autoridade Munisípiu Bobonaro, Alexandrino Pires, halo enkontru ho autoridade postu administrativu Bobonaro, funsionáriu públiku no líder komunitária sira hosi suku 18. Imajen Tatoli/Sérgio da Cruz.

BOBONARO, 08 maiu 2024 (TATOLI)-Autoridade Munisipál Bobonaro (AMB) lideradu Alexandrino Pires, alerta ba komunidade liu-liu hakiak-na’in sira atu hadok animál sira ne’ebé kesi no husik livre iha estrada públiku ka estrada protokolu diresaun postu Administrativu Balibo no Atabae, tanba iha tempu badak governu sei halo operasaun no foti asaun rigoroza  tanba kontra dekretu lei númeru 03/2024,17 janeiru kona-bá ijiene orden públiku.

Prezidente Autóridade Munisipál Bobonaro, Alexandrno Pires, haktuir antes ne’e Sekretáriu Estadu Asuntu Toponímia no Organizasaun Urbana, Germano Santa Brites, kria ona diálogu ho komunidade Atabae no Balibo iha Bee-Malae, hodi divulga lei no dekretu lei sira atubele konsiensializa hakiak-na’in sira muda-sees animál ne’ebé movimentu livre iha estrada protokolu.

Notísia relevante: AMB orienta konsellu suku muda fahi-luhan iha fatin públiku

“Agora ita-nia inan-aman sira sei nafatin to’os, husik livre animál iha dalan protokolu, ne’ebé ha’u atu apela ba komunidade inan-aman sira hotu, iha kapitál Maliana, Atabae no Balibo, ita-nia lei orden públika ne’e agora implementa ona katak, ba animál ne’ebé husik livre de’it estadu sei foti medida no asaun hasoru animál sira-ne’e,” nia ko’alia iha Maliana, tersa ne’e.

Autoridade Munisipál Bobonaro hasai ona sirkulár ba líder komunitária no autóridade postu sira atu ko’alia ho komunidade sira-ne’ebé hakiak animál besik estrada no fasilidade públiku sira tenke muda fatin ba dook.

Nia hatutan, bainhira komunidade sira la kumpri no la obesede ba lei no regulamentu sira, Autoridade Munisipál Bobonaro hamutuk ho governu sei foti medida rigorozu.

Autoridade Munisípiu Bobonaro, hola desizaun ne’e bazeia ba dekretu-lei númeru 3/2024 17 janeiru, no mós alterasaun dahuluk ba dekretu-lei númeru 33/2008 27 agostu, iha artigu 1 ko’alia kona-ba natureza, artigu 3 kona-ba infrasaun kontra ordenasaun sira ne’ebé sei hetan sansaun ka multa, artigu 5, alinea a, h ne’ebé ko’alia kona-ba proibisaun sira.

Notísia relevante: Autoridade RAEOA sei restrinje sirkulasaun animál iha área urbana

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!