MS inaugura edifísiu mini-laboratóriu iha Sentru Saúde Maliana
BOBONARO, 10 maiu 2024 (TATOLI) – Ministeriu Saúde (MS) liuhusi Diretora Jerál Kuidadu Saúde Primária, Elisabet Leto Mau, akompaña husi Administradora Fundu Globál iha Timor-Leste, hamutuk ho Sekretáriu Autoridade Munisipál Bobonaro Asuntu Sosiál, Júlio Carvalho Caeiro, sesta ne’e inaugura edifísiu mini-laboratóriu iha Sentru Saúde Maliana.
Diretór Servisu Saúde Munisípiu Bobonaro, Gíl Bernardo Vicente, esplika, estabelesimentu mini-laboratóriu ne’e atu halo diagnóstika ba moras ne’ebé pasiente sira sofre.
“Ita hatene katak durante ne’e ita presiza iha kada fasillidade sira hotu, tenke ser kompleta ona mini-laboratóriu, entaun ho ida-ne’e ita bele halo ona atividade diagnóstiku nian,” nia informa ba jornalista sira hafoin inaugurasaun.
Gíl Bernado apela ba profisionál saúde sira atu kuida no uza didi’ak fasillidade no ekipamentu ne’ebé iha no sei halo pedidu ba Ministériu Saúde atu kompleta ekipamentu hodi fasilita servisu diagnóstiku, liuliu analiza amostra pasiente nian.
Nia husu ba komunidade sira atu hakbesik-aan ba Sentru Saúde Maliana atu nune’e bele halo detesaun sedu ba moras TBC, malária, dengue, teste ba inan isin-rua no seluk tan.
“Ita iha ona ekipamentu ba laboratóriu nian, atu halo analiza ba raan, ita-nia me’ar tasak no moras seluk tan ita bele detata ona,” nia hateten.
Biban ne’e, Xefe Sentru Saúde Maliana, Anacleto Godinho Pereira, agradese ba Fundu Globál ne’ebé fó apoia orsamentu hodi konstrui fasillidade saúde no konsidera obra ne’e ne’e bele fasilita profisionál saúde halo analiza ba amostra pasiente sira-nia.
“Husi 2013 loke Sentru Saúde Maliana, ami laiha laboratóriu, agora iha ona liuhosi apoia Fundu Globál, ami sei halo serbisu, liuliu halo detesaun sedu ba pasiente sira-ne’ebé aprezenta sira-nia moras ba pesoál saúde sira,” nia dehan.
Enkuantu obra ne’e Fundu Globál apoia no konstrui ho orsamentu rihun $25.
Notísia relevante: Sentru Saúde Maliana rejista pasiente 1.206 sofre IRA
Jornalista: Sérgio da Cruz
Editór: Evaristo Soares Martins
