DILI, 10 maiu 2024 (TATOLI)—Programa Merenda Eskolár daudaun ne’e implementa ona iha eskola sira iha territóriu tomak, maibé iha munisípiu rua hanesan Viqueque no Ataúro mak seidauk.
“Seidauk la’o tanba munisipiu Viqueque foin lalais troka malu direjente sira, tanba ne’e presiza iha dadus ne’ebé asina, relasiona ho banku no Ekipa Jestaun Programa (EJP). Tanba ne’e maka atraza oituan, enkuantu munisípiu Ataúro atraza oituan tanba prosesu relatóriu husi EJP sira ba finansa tarde, entaun transferénsia segundu períodu nian tarde,” Direitór Nasionál Edukasaun Inkluzivu Asaun Sosiál Eskolár husi Ministériu Edukasaun (ME), Fernando Soares, informa iha ninia knaar fatin, Vila Verde, sesta ne’e.
Notísia relevante : Edukasaun Baucau lansa programa merenda eskolár
EJP la’o tuir kalendáriu implementasaun merenda eskolár no menu ai-han sira ne’ebé hakerek ona iha manuál. Nune’e, EJP sira kuaze tuir orientasaun menu ne’ebé prepara ona antes ne’e no tuir produtu lokál ne’ebé iha.
“Ho nune’e bele promove produtu lokál, dalaruma menu bele muda bazeia ba kondisaun, ezemplu eskola iha área remota sira, menu manu tolun ho na’an, dalaruma situasaun iha eskola ne’e ba na’an laiha, distánsia dook atu bá merkadu, ne’e menu bele troka. EJP sempre implementa menu tuir manuál merenda eskolár nian no dala ruma la tuir tanba depende ba kondisaun tanba dook husi merkadu. Ida-ne’e sempre akontese maibé la’ós loron-loron,” nia akresenta.
Aleinde ne’e, EJP sira lakohi foti osan barak liu tanba eskola laiha fatin rai osan, tanba membru balun iha koñesimentu di’ak kona-ba konta rai osan, ne’e duni sira bele foti osan trimestrál dala-ida, maibé iha balun foti kada semana, hotu sira ba foti fali.
Daudaun ne’e, ME rejista totál eskola ensinu báziku iha territóriu hamutuk 1.103, ensinu pre-eskolár iha 50, enkuantu ensinu báziku no pre-eskolár iha 74.909.
Jornalista : Osória Marques
Editora : Julia Chatarina
