BAUCAU, 06 maiu 2024 (TATOLI) – Servisu Munisipál Edukasaun Baucau hahú lansa hodi implementa programa merenda eskolár tinan 2024.
Diretor Servisu Edukasaun Munisipál Baucau, Afonso dos Santos Freitas esplika, benefisiáriu ba programa referida maihosi estudante pre-eskolár no Ensinu Báziku komposta hosi privadu no públiku ho totál benefisiáriu 1.227.
“Ohin ita halo lansamentu, programa nee importante atu kompleta prosesu aprendizajen,” Diretór Servisu Munisipál Edukasaun Baucau hateten iha Vila Nova, segunda ne’e.
Programa merenda eskolár ba tinan-ne’e ho totál loron efetivu 155 ne’ebé fó prioridade ba produtu lokál no la inklui hahan inportasaun hanesan sosis no ayam potong.
Alokasaun orsamentu ba programa merenda eskolár iha Baucau hamutuk millaun rua-resin, ne’ebé kada estudante sei iha direitu haan sentavu 0,42, hahú hosi segunda to’o sesta.
“Menu produtu lokál de’it hanesan haforsa, haburas no protesaun mak kompleta malu,” Afonso Freitas akresenta.
Prezidente Autoridade Munisípiu (PAM) Baucau, Veneranda Lemos, husu estudante sira atu observa hanesan kontrola ba hahan hanesan atu halo keixa bainhira hahan ladi’ak no latuir menu.
“Iha Baucau ohin halo lansamentu ba merenda eeskolár, ha’u husu oan sira halo observesaun ba hahan ne’ebé fó, nune’e hatene di’ak ka ladi’ak,” Veneranda Lemos hateten.
Menu ba programa merenda eskolár hosi loron-segunda, estudante sira sei haan etu, modo, naan bifi, mostarda no hudi tasak. Tersa haan etu, manu tolun, ai-farina tahan no ai-dila tasak.
Loron-kuarta estudante sei hana etu, modo koto mean, naan karau no salada frutas. Kinta, haan etu no na’an, modo raba raba no es-buah, enkuantu iha loron-sesta menu etu tempe tahu, fore sikoti no salada frutas.
Tuir dadus, benefisiáriu ba programa merenda eskolár ba tinan-2024 iha munsípiu Baucau hamutuk 1.227, kompostu husi pre-eskolar hamutuk 41 no ensinu báziku 253, kompostu husi eskola públiku no privadu sira.
Jornalista : Natalino Belo
Editór : Evaristo Soares Martins
