iklan

DILI, POLÍTIKA

PPN: Liberdade imprensa no espresaun nu’udar direitu fundamentál iha demokrasia

PPN: Liberdade imprensa no espresaun nu’udar direitu fundamentál iha demokrasia

Presidente Parlamentu Nasionál, Maria Fernanda Lay. Imajen Tatoli/Egas Cristóvão

DILI, 10 maiu 2024 (TATOLI)-Prezidente Parlamentu Nasionál (PPN), Maria Fernanda Lay,  konsidera liberdade imprensa no liberdade espresaun nu’udar direitu fundamentál iha ita-nia demokrásia nu’udar nasaun joven.

“Ha’u hakarak hatete momoos iha ne’e dala ida tan katak, pozisaun Parlamentu Nasionál metin, no ha’u mós garante ha’u-nia empeñu rasik, hodi defende liberdade meios   komunikasaun nian iha Timor-Leste. Bainhira ha’u asume knaar nu’udar Prezidente PN iha juñu 2023, ha’u mós asume dala ida kompromisu metin ba integridade no ba kredibilidade no ha’u defende maka’as liberdade espresaun  nu’udar direitu fundamentál iha ita-nia demokrasia nurak, direitu ida ne’ebé labele halakon duni,’’ PPN hato’o iha nia intervensaun bainhira halo abertura ba The Dili Dialogue Forum  2024 ho tema  ‘’A PRESS FOR THE PLANET: JOURNALISM IN THE FACE OF THE ENVIRONMENTAL CRISIS’’  ne’ebé realiza husi Conselho de Imprensa Timor-Leste (CI),iha salaun Multiuzu GMN, Bebora, Dili, sesta ne’e.

Nia hatutan, tuir Repórteres Sem Fronteiras iha 2023 fó sai ranking liberdade imprensa Timor-Leste okupa pozisaun 10 husi nasaun 180 iha mundu no ida-ne’e halo ita hotu laran-ksolok.

Enkuantu iha tinan 2024 Timor-Leste (TL) monu iha ranking liberdade imprensa ne’ebé fó sai husi Repórteres Sem Fronteiras iha loron mundiál Liberdade Imprensa 03 maiu. Hosi pozisaun da-10 iha tinan kotuk, país tunn ba da-20, ho pontu 78,92 husi totál nasaun 180.

“Timor-Leste iha 2024 tuun ba númeru 20, kontinua enkoraja jornalista sira ninia indepedénsia iha hakerek no espresaun, maibé tuun ba númeru 20 ida-ne’e la’ós piór entre 180, ida ne’e di’ak, no dezafiu maibé kontinua enkoraja,’’ nia enkoraja

Tuir Organizasaun Nasaun Unida (ONU) nia liafuan, imprensa livre nu’udar “fatuk baze” ba sosiedade demokrátika sira hodi luta hasoru dezinformasaun no konforme ita-boot sira hatene, loron mundiál Liberdade Imprensa nian, ne’ebé komemora dezde tinan rua-nulu liubá ho apoiu husi ONU nia objetivu maka “selebra prinsípiu fundamentál liberdade jornalizmu nian no hametin Governu sira-nia kompromisu ba jornalista sira no ba liberdade hodi hala’o sira-nia profisaun”.

“Só imprensa ida ne’ebé livre no independente tebes, nu’udar “quarto poder”, mak bele sai mahein hodi garante sidadaun sira-nia direitu no liberdade, serbisu iha xefe Estadu, Parlamentu no Tribunais nia sorin,’’ nia hateten.

Notísia relevante:Mídia iha papél fundamentál informa no eduka populasaun kona-ba kestaun ambientál

Jornalista: Nelson de Sousa

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!