Entidade oin-oin presta omenajen ba Helen Hill ho misa requiem

DILI, 11 maiu 2024 (TATOLI)–Entidade oin-oin husi Governu Timor-Leste hamutuk sosiadade sivíl, akadémiku, ativista no grupu apoiu solidaridade internasionál presta omenajen ba Helen Hill liuhusi kari ai-funan iha Portu Dili no husu misa requiem iha Igreja Santo António Motael, ne’ebé prezide husi Amu David Alves da Conceição.

Helen Hill hahú vizita Dili ba dahuluk iha inísiu tinan 1975, ne’ebé momentu ne’ebá kedan fó kontribuisaun no solidaridade ba prosesu luta libertasaun Timor-Leste nian.

Ministra Edukasaun, Dulce de Jesus, hateten, Helen Hill nu’udar feto ida-ne’ebé mak durante nia moris dedika-an ba Timor-Leste.

”Helen Hill ninia kontribuisaun ba Timor-Leste boot tebes, tanba desde iha tinan 1974 nia apoiu Timor-Leste nia ukun rasik-an liuhusi movimentu sira-ne’ebé nia organiza iha Austrália hodi husu solidaridade internasionál. Tanba ne’e, ohin ita hamutuk iha ne’e, husu misa requiem ba ita-nia amiga di’ak nia falesimentu hodi presta ita-nia omenajen ba nia,” Ministra hato’o hafoin partisipa iha misa, sábadu ne’e.

Iha fatin hanesan, Embaixadora Austrália iha Timor-Leste, Caitlin Wilson, louva Helen Hill nia serbisu durante ne’e.

“Nia feto ida-ne’ebé iha espíritu boot tebes, feto ne’ebé maka brani no estraordinária tebes, nia ajuda tebes Timor-Leste iha aspeitu oin-oin, ho ida-ne’e no legadu sira sai memória di’ak ba ita hotu. Ha’u hanoin ita bele hamutuk kontinua nia legadu sira-ne’ebé ba oin,” nia tenik.

Nune’e mós, antigu Vise-Ministru Ensinu Superiór, Virgílio Marçal, haktuir, momentu nia sei asume kargu hanesan membru Governu iha V Governu, hetan orientasaun husi Primeiru-Ministru Kay Rala Xanana Gusmão atu dezenvolve di’ak liután kurríkulu ensinu superiór tanba momentu ne’ebá Xefe Governu preokupa ho kurríkulu, entaun hetan mós atensaun husi saudoza.

“Señora matebian Helen Hill mak momentu ne’ebá hamutuk ho ami deskute kurríkulu iha fulan-ida de’it hodi lori ba aprova iha Konsellu Ministru. Ha’u hato’o ha’u-nia sentidu pezar ba matebian tanba nia ema ne’ebé di’ak tanba fó ona nia konstrubuisaun ba dezenvolvimentu setór edukasaun iha Timor-Leste, liu-liu halo kurríkulu ba ensinu,” Virgílio Marçal, haktuir.

Notísia relevante : Deklarasaun Primeiru-Ministru Kona-bá Falesimentu Helen Hill

Nune’e mós, Diretór Ezekutivu Fórum Organizasaun Naun Governamentál Timor-Leste (FONGTIL), Valentim da Costa, hateten, sosiadade sivíl Timor-Leste sente triste.

“Ha’u lori sosidade sivíl tomak hakarak presta omenajen ba fasimentu Helen Hill,” nia dehan.

Iha fatin hanesan, Vise-Prezidente Komisaun Organizadora ba misa requiem Helen Hill, Esménio Martins da Silva, deskreve, Helen Hill nu’udar feto ida-ne’ebé fó ona nia kontribuisaun desde tinan 1974 bainhira Timor-Leste luta ba ukun rasik-an.

“Momentu ne’ebá nia komesa luta ona ba Timor-Leste nia independénsia hamutuk ho grupu apoiu solidaridade internasionál timoroan iha Austrália, ne’ebé grupu ne’e bolu East Timor Action Network  no  Australian East Timor Association inklui movimetu seluk iha Austrália liuhusi nia hakerek envolve manifestasaun sira hodi husu apoiu internasionál ba Timor-Leste nia ukun-an. Daudaun nia la hamutuk ho ita, fila hikas ona ba mundu seluk, ohin ita husu misa requiem no kari ai-funan iha Portu Dili ho objetivu atu presta omenajen ba señora Helem Hill atu nia klamar hetan fatin di’ak no kontinua tau matan ba ita,” nia dehan.

Esménio Martins konsidera, saudoza ninian konstribuisaun boot tebes tanba aleinde nia kontribui ba luta ukun-an, nia mós konstribui tebes ba Timor-Leste nia prosesu dezenvolvimentu iha área edukasaun.

“Ita sente lakon ita-nia belun di’ak hanesan Helen Hill, nia fó nia-an tomak ba Timor-Leste nia ukun-an no hafoin ukun-an nia kontinua fó nia konstribuisaun,” nia tenik.

Komisaun hato’o ona ba parte Prezidente Repúblika, José Ramos Horta no Primeiru-Ministru, Kay Rala Xanana Gusmão, hodi hato’o mensajen ba falesimentu Helen Hill hodi presta omenajen ba matebian, nune’e Prezidente no Primeiru Ministru halo ona no komisaun mós solisita ona ba Parlamentu Nasionál iha segunda (13/05) sei presta votu pezar ba nia falesimetu.

Aleinde ne’e, Komisaun sei halo atividade kalan reflesaun ne’ebé sei partisipa husi entidade Governu balun, sosiadade sivíl no ativista sira.

Helen Hill nu’udar mentora ba estudante timoroan barak iha Dili no iha Universidade Victoria iha Melbourne, ne’ebé nia hanorin durante tinan barak.

Nia mós nu’udar ko-organizadora ba konferénsia bienál iha Universidade Victoria no Universidade Nacional Timor-Lorosa’e (UNTL), nu’udar Profesora Konvidada iha UNTL no Membru Onoráriu Universidade Victoria nian.

Nia simu medalla agradesimentu ho Orden Timor-Leste, ba ninia vida solidariedade ba país iha tinan 2014.

Helen mós nu’udar ko-fundadora ba Asosiasaun Austrália no Timor-Leste no ajuda fahe Timor-Leste nia istória no luta ba mundu.

Jornalista     : Natalino Costa

Editora          : Julia Chatarina