VIQUEQUE, 11 maiu 2024 (TATOLI)–Asosiasaun Futeból Viqueque (AFV), sábadu ne’e, realiza kongresu ba datoluk ho tema ‘Futeból ba ema hotu: paixão, progresu no orgullu nasionál’ no iha biban hanesan eleisaun hodi hili jerente foun liuhusi votasaun.
Eleisaun ne’e la’o ho pakote úniku, ne’ebé partisipa husi delegadu/a hamutuk na’in-14 husi klube futeból, sentru juviníl no arbitrajen, ikus mai hili Jaime Sarmento eleitu sai Prezidente asosiasaun ba períodu 2024-2029.
Prezidente AFV Viqueque eleitu, Jaime Sarmento, kompromete sei lori desportu iha munisípiu Viqueque ba oin.
“Ha’u nu’udar ema futebolista ida-ne’ebé hakarak hadi’a futeból, liu-liu iha munisípiu Viqueque, atu promove joven sira-nia talentu desportiva. Ho ida-ne’e maka hakarak kandidata-an ba Prezidente AFV nian, ba konfiansa sira-ne’ebé mak fó ba ami. Ita hotu hatene katak atu organiza jogu futeból ruma la fasil, maibé ita hamutuk bele lori desportu iha Viqueque,” Jaime Sarmento, hateten hafoin kongresu ramata, iha salaun Santu Estevão, iha Viqueque, sábadu ne’e.
Notísia relevante : ESJ 04 setembru Viqueque inisiativa realiza atividade desportiva komemora loron istóriku
Nune’e, nia husu ba klube futeból sira iha munisípiu Viqueque atu halibur iha edifísiu AFV hodi fó hanoin ba malu dezenvolve desportiva.
“Ita hamutuk hodi alkansa ita-nia mehi ne’ebé hakarak dezenvolve futeból iha munisípiu Viqueque. Tanba ne’e, presiza ita hotu nia kooperasaun no kolaborasaun hamutuk atu atinje ita-nia mehi,” nia akresenta.
Iha fatin hanesan, Sekretáriu Jerál Federasaun Futeból Timor-Leste (FFTL), Gregório Cerreia, apresia tanba atividade ne’e bele la’o ho susesu, maski FFTL aloka orsamentu ho montante $1.000 hodi realiza kongresu, maibé membru asosiasaun bele dirije kongresu ida-ne’e hodi hili estrutura foun ba períodu tinan-lima.
“Tanba ne’e, liuhusi estrutura AFV foun ne’ebé ohin eleitu ho estrutura sira, ha’u husu labele kahur ho polítika, hala’o de’it atividade asosiasaun nian. Nune’e ita serbisu hamutuk no koopera malu oinsá atu lori desportu ne’e ba oin,” nia fó hanoin.
Nune mós, Komandante Polísia Nasionál Timor-Leste (PNTL) munisípiu Viqueque, Superintendente, António Rego Fernandes, apresia tanba AFV hili ona estrutura foun hodi organiza atividade futuból hodi bele anima abitante sira.
“Kona-ba kestaun AFV labele tauk tanba PNTL prontu asegura durante eventu desportiva sira. Ha’u agradese ba asosiasaun futeból ne’ebé realiza ona kongresu. Ha’u espera ba oin asosiasaun bele realiza jogu futeból no voliból sira iha Viqueque hodi halo rame kapitál Viqueque. Tanba durante ne’e haree eventu desportivu mínimu liu. Nune’e, ha’u dezafia estrutura eleitu sira atu lori desportu ba oin no promove talentu joven sira-nia ba nasionál,” nia hato’o.
Kongresu ne’e partisipa husi autoridade lokál, observadór, klube futeból, kongresista sira inklui juviníl sira-ne’ebé eziste iha munisípiu Viqueque.
Jornalista : Vitorino Lopes da Costa
Editora : Julia Chatarina
