BOBONARO, 11 maiu 2024 (TATOLI)—Prezidente Autoridade Munisípiu (PAM) Bobonaro, Alexandre Pires, hamutuk ho entidade oin-oin, sábadu ne’e, kuda ai-oan 200 iha aldeia Mapelai, suku Lebos, postu administrativu Lolotoe, munisípiu Bobonaro, ho objetivu atu konserva bee-matan.
Atividade ne’e partisipa mós husi Primeiru Sekretáriu Autoridade munisipál ba asuntu Administrasaun no Finansa, Domingos da Costa, hamutuk ho Diretór Servisu munisipál sira, inklui Autoridade postu no komunidade loká.
PAM sente kontente no hato’o apresiasaun ba Diresaun Servisu Munisipál Água no Saneamentu, Ambiente no Diresaun Servisu Munisipál Agrikultura, ne’ebé iha insiativa di’ak hodi organiza aktividade ne’e.
“Ita hahú agora, nasaun ne’e sei ba oin, nasaun ne’e sei la bá kotuk, saida mak iha ita-nia oin ita tenke hahú, labele hein de’it mak osan, ki’ik-oan sira ita hahú agora para ita lori haree ida-ne’ebé presiza osan boot mak ita tau-osan ba,” nia hateten.
Notisia Relevante: PMOPA iha postu Bobonaro sei kuda ai-oan 1.600
Nia promete, atividade hanesan sei kontinua realiza iha fatin seluk hodi halo konservasaun ba bee tanba bee importante tebes ba ema-nia moris.
Iha biban hanesan, Autoridade munisipál ne’e apela ba líder komunitária no komunidade hotu atu kuida no halo lutu haleu ai-oan hirak ne’e, nune’e bele konserva bee-matan no halo ambiente sai matak liután iha futuru.
“Inan-aman sira saida mak ohin ita halo ita sei la sente agora, maibé tinan-lima ba to’o tinan-10 mai ita liu mai sei sente katak ne’e ha’u-nia obra,” PAM Bobonaro tenik.
Iha fatin hanesan, Administradór postu administrativu Lolotoe, Sebastião Amarál, agradese ba Governu ne’ebé iha hanoin di’ak atu hamatak ambiente no konserva bee.
“Ida-ne’e di’ak ba ita no ba ita-nia oan sira, ha’u sei esforsu para kuda nafatin, aumenta tan depois sei halo lutu para animál labele estraga ai-horis ne’ebé mak ohin ita kuda,” Administradór dehan.
Nune’e mós, Xefe ekipa JNR husi aldeia Mapelai, Paulo Afonso, hateten, atividade ne’e realiza tanba bee-matan barak iha Lolotoe maka laiha ai atu konserva bee.
“Ai-oan ohin ita kuda ne’e dada bee-maka’as hotu, ohin ita kuda, ita hakarak aban bainrua ita-nia jerasaun sira labele dehan ita bee menus,” nia salienta.
Ai-oan ne’ebé kuda iha espésie tolu hanesan abet, mahoni no ai modelu rambutan.
Jornalista : Sérgio da Cruz
Editora : Julia Chatarina
