DILI, 13 maiu 2024 (TATOLI)–Komisáriu Autoridade Aduaneira (AA) ka Alfándega, José António Fátima Abilio, hakotu iis iha Hospital Nasionál Guido Valadares (HNGV), iha segunda (13 maiu 2024) dadeersan, tuku 05h30.
Notísia Relevante: Alfándega planeia rekruta pesoál 60 apoia adezaun ba OMK no ASEAN
Reorezentante familia matebian, Melania Maria da Costa, hateten komisáriu hahú moras iha fulan-marsu no baixa iha HNGV durante fulan ida, hafoin alta husi ospitál ho de’it ona kadeira roda.
Tratamentu kontinua halo iha uma no tuir planu atu halo tratamentu iha rai-li’ur iha loron 09 Maiu semana kotuk, maibé lakonsege ba no lori fila ba emerjénsia iha HNGV, maibé ohin dadeersan Maromak bolu nia husik hela familia tomak.
“Maun sente oin nakukun iha loron 04 marsu, momentu isar bandeira iha Ministériu Finansas. Entaun tula diretamente nia ba HNGV, to’o nia baixa ne’ebá hodi halo tratamentu. Maun nia moras durante ne’e mak sofre asam urat de’it,” matebian nia feton, Melania Maria da Costa, hateten ba Agência Tatoli, iha matebian nia rezidénsia Santa Cruz, segunda ne´e.
Matebian mós hetan moras komplikadu hanesan moras stomuk no seluk tan ne’ebé halo nia ko´alia ladi´ak no tenke hakilar sai.
Matebian husik hela nia espoza no oan na´in neen (6) ne´ebé kompostu husi mane lima no feto na´in-ida (ida), ho nia beioan hamutuk na´in-haat (4).
Matebian José António Fátima Abilio moris iha Same iha loron 14 maiu 1966 no mate iha loron 13 maiu 2024.
Matebian hala’o estudu no gradua iha Siensia polítika no sosial iha Universidade Gadja Mada, Yogyakrata, Indonézia. Matebian mós hasai kursu iha Administrasaun Públika iha Akademia de Administrasaun Públika iha Malang, Indonésia, iha tinan 1989.
Durante moris, matebian mós asume kargu servisu liu tinan 35 iha setór públiku iha munisipiu Manufahi.
Iha 2002, matenian sai vise diretór Planeamentu no Koordenadór Asisténsia, xefe gabinete iha Ministériu Finansa no sai Komisáriu Autoridade Aduaneira liuhosi despaxu Ministeriál 26/VIII/GM-MF/2021-09, iha 2021.
Jornalista : Jesuína Xavier
Editór : Cancio Ximenes
