Laisorulai FC susesu hadau pontu tolu husi Maubale FC

DILI, 13 maiu 2024 (TATOLI) – Ekipa istimadu Laisorai FC susesu hadau pontu tolu husi nia adversáriu Maubale FC bainhira hurlele ho golu 2-0 iha kopa Maun Boot Kay Rala Xanana Gusmão ne’ebé realiza iha Estádiu Munisipál Dili, segunda lokoraik ne’e.

Bainhira jogu hahú iha kampu modok nia leten, jogadór ekipa rua lansa kedan kontra no atake ba malu tuir tékniku no abilidade ekipa idaidak nian ho objetivu hatama golu bainhira se mak forsa liu.

Durante jogu Maubale mai ho jogu defebsivu no halo mós jogu ofensivu, enkuantu Laisorulai mós halo jogu ho modelu ofensivu ka duir bola makas liu ba lina oin Maubale nian nune’e bele hatama lalais golu.

Esforsu hotu Laisorulai halo hela de’it hanesan esforsu tanba avansadu sira seidauk prodús golu maske lina klaran hatama bola mesak furak de’it. Sutu barak mak Laisorulai nia avansadu halo maibé sutu hirak ne’e nunka kona iha alvu.

Maubale mós la nonok tenta hamate tutuir Laisorulai nia jogu halo jogadór Laisorulai tenke servusu makas, halai haleu kampo laran, kosar metan sai maibé nunka halo golu hodi fó kontente ba adeptus sira ne’ebé tur nahe aan iha tribun leten.

Haree ba Maubale la hatudu jogu ne’ebé di’ak no lakon bola barak liu treinadór Moises deside dada sai jogadór Elias Sanches (5) iha minutu 25 hodi hatama fali jogadór Coddrin da Silva (3) nune’e bele halo defensivu iha lina defeza.

Maske troka ona jogadór maibé Maubale nafatin lakon bola tanba Laisorulai halo presaun ne’ebé makas fó amesa hela de’it ba guarda rede Maubale. Maibé Maubale fiar aan hodi hatudu jogu ne’ebé profesionál.

Susar tebes ba Laisorulai atu prodús golu treinadór Laisorulai deside dada sai jogadór avansadu Flaviano do Rosario (31) hodi hatama fali jogadór Filipe da Costa hodi reforsa fali husi lina klaran iha minutu 30.

Husi rezultadu troka jogadór ne’e Laisorulai hetan kedan jogu furak halo Maubale terus liutan, nune’e iha minutu 40+2 jogadór Martinho Belo (23) lansa ona golu primeiru hodi muda rezultadu ba 1-0.

Golu ne’e mak termina ekipa rua nia jogu iha minutu primeiru nune’e Laisorulai provijoriu lidera jogu ho eskuru 1-0.

Hakat ba segunda parte ekipa rua mantein ho kualiade jogu maibé Laisorulai hatudu jogu ne’ebé brillante halo Maubale susar atu responde golu.

Esforsu barak Maubale halo maibé esforsu hirak ne’e hela de’it ho naran tanba la hatudu rezultadu signifikadu hodi fó vitoria ba ekipa.

Jogu la’o to’o minutu 56 treinadór Laisorulai tenta halo mudansa tan jogu nune’e bele aumenta golu, nune’e dada sai jogadór Manuel da Costa (39) hodi hatama fali jogadór Mario Fernandes (24) nune’e bele halo barullu iha lina oin Maubale nian.

Husi mudansa ne’ebé Laisorulai halo fó presaun liutan ba Maubale treinadór deside halo mudansa ba estratejia jogu hodi hatama jogadór Pedro Fernandes (22) nune’e hasai jogadór Coddrin da Silva iha minutu 58, iha minutu hanesan hatama mós jogadór Expedito Ximenes (24) no hasai jogadór Antonio Martins (7) nune’e bele halo atake hasoru Laisorulai.

Bainhira jogadór hirak ne’e tun halo mudansa uitoan ba Maubale nia jogu, maibé laiha sorte atu prodùs golu tanba Laisoru lai mós taka makas iha lina defeza nian.

Maibé iha minutu 68 sorte di’ak monu ba Laisorulau tanba bola barullu iha lina oin Maubale halo jogadór barak la konsentra ho di’ak jogadór Laisorulai, Pedro da Costa (7) lansa kedan sutu ho velosidade makas halo guarda rede Maubale halai sala bola tama liu rede laran hatur rezultadu nakfilak ba 2-0.

Golu ne’e halo Maubale nia jogadór sira triste liutan tanba tenke servisu makas iha kampo laran nune’e bele halo empata jogu ne’e. Maibé la konsege halo empata jogu tanba Laisorulai hatudu jogu matenek ho tatika ne’ebé kualidade.

Ho golu ne’e treinadór Maubale deside dada sai tan jogadór na’in rua iha minutu 69 Mariano Pinto (16) no Pedro Pires (11) tama no hasai Zesinho Costa (13) ho Zelvanio Alberto (10) maibé la halo mudansa ba jogu to’o minutu termina vitoria hela ba Laisorulai mak iha direitu absoluta ba pontu tolu no Maubale obrigado hela ho derrota.

Iha tabela klasifikasaun provijoriu grupu H Taibessi FC mak lidera ho lontu 3, tuir Laisorulai FC ho lontu 3, tuir Maubale, Daudere hela ho pontu zero amesadu elemina husi faze grupu.

Jogu ne’e dirije husi árbitru prinsipál Francisco Pereira, juiz liña Ricardo Amaral, Junifelson dos Santos no árbitru rezerva Bernardinho Mascarinhas.

Notísia relevante: Manán Relay 3-0, Zhavia provizóriu lidera grupu A iha kopa Xanana

Jornalista: Hortencio Sanchez

Editór: Florencio Miranda Ximenes