DILI, 13 maiu 2024 (TATOLI)—Membru Parlamentu Nasionál (PN) liuhusi Deputadu bankada CNRT, Francisco da Costa ‘Ikulai’, husu Governu liuhusi Sekretária Estadu Terras no Proriedade (SETP) atu identifika sidadaun ne’ebé okupa rai Estadu konstrui uma hodi fó aluga tutan ho ema seluk hodi hetan lukru.
Notísia Relevante: Governu la rekupera uma vítima dezastre naturál ne’ebé okupa rai Estadu
“Asset Estadu nian ne’ebé tempu portugés no Indonézia husik hela, ida-ne’e nakfila ba asset Estadu RDTL nian. Husu atu bele identifika ona, tanba maluk Deputadu lubun ida ona husi opozisaun no bankada Governu aprezenta, hanoin ita tenke identifika ona. Tanba ema lubun ida halimar hela ho direitu Estadu ida-ne’e nian, okupa tiha rai Estadu depois halo uma andar fó ba ema seluk aluga, nia ba okupa tan rai Estadu nian. Tanba ne’e, Ministériu Justisa liuhusi Sekretáriu Estadu Terras no Proriedade atu identifika ona rai Estadu ne’e,” nia levanta liuhusi reuniaun plenária Parlamentu, segunda ne’e.
Nia husu Sekretária Estadu Terras no Proriedade (SETP) presiza identifika hodi propriedade sira ne’e direitu ba Estadu nian, se la’e sidadaun balun utiliza rai Estadu harii uma boot ka andar hodi fó aluga tutan.
Ezemplu, nia dehan, konstrusaun uma hanesan loza xineza sira nian ne´ebé konstrui besik iha estrada públiku sira-ne’e, sidadaun timoroan fó aluga ba xineza sira selu kada tinan ho kustu boot.
Deputadu CNRT, Natalino dos Santos, sekunda mós ho preokupasaun relasiona ho proriedade Estadu.
“Ha’u preokupa tebe-tebes. Ita haree iha fati-fatin uma perumahan sira-ne’e prioriedade Estadu nian, maibé ita haree ema barak konstrui ka halo tiha ona andar sa’e tiha ona. Oinsá, seráke sira hetan lisensa husi Governu ou sira aluga ka selu arrendamentu ba Estadu,” nia dehan.
Nia preokupa, bainhira iha futuru Estadu uza fali fatin ne’e karik halo eviksaun, povu sira bele lakon sira-nia osan ne’ebé gastu hosi harii uma.
Entaun, nia husu MJ liuhusi SETP atu bolu atensaun ba ita-nia sidadaun sira labele konstrui uma iha rai Estadu nia tanba bainhira iha futuru Estadu hakarak uza fali fatin ne’e kria konfuzaun.
Vise Ministru ba asuntu Parlamentár, Adérito Hugo da Costa, rejista preokupasaun sira husi membru Parlamentu Nasionál sira hodi envia ba ministériu tutela.
Jornalista : Nelson de Sousa
Editór : Cancio Ximenes
