MSSI entrega fasilidade serbisu ba Sentru Solidaridade Sosiál iha munisípiu sira

DILI, 13 maiu 2024 (TATOLI)—Ministériu Solidaridade Sosiál no Inkluzaun (MSSI), segunda ne’e, entrega fasilidade hanesan motór 15, komputadór ualu no kadeira hitu ba Sentru Solidaridade Sosiál iha Baucau, Bobonaro no Aileu inklui Rejiaun Administrativa Espesiál Oé-cusse Ambeno (RAEOA).
Ministra Solidaridade Sosiál no Inkluzasaun, Verónica das Dores, hateten, fasilidade hirak ne’e hodi fasilita Pontu Vokál programa Bolsa da Mãe Kondisionál iha munisípiu sira hodi halo serbisu iha terrenu.
“Ha’u husu ba ita-boot sira-ne’ebé ohin simu ona motór tenke uza ho kuidadu hodi hala’o imi-nia atividade ho di’ak iha terrenu, labele halo diskriminasaun bainhira foti dadus ruma iha terrenu hanesan haree ba kór no rasa, maibé serbisu ho onestidade tanba imi mak sai liman ain ba Ministériu Solidariedade Sosiál no Inkluzaun nian iha terrenu,” Ministra informa iha resintu edifísiu MSSI, Caicoli.
Notísia relevante : Governu hala’o ona pagamentu bolsa da mãe kondisionál 40.112 iha 2023
Biban ne’e, nia mós apela ba Pontu Vokál sira, tenke atensaun no rigór bainhira foti dadus benefisiáriu programa Governu.
“Labele hakerek vulnerável sira-nia uma ladi’ak tau fali seluk mak uma di’ak, “]husu favór ida labele akontese,” nia akresenta.
Iha fatin hanesan, Pontu Vokál husi munisipiu Aileu, Filomena da Costa Bonaparte, agradese ba MSSI tanba bele fasilita transporte hodi hala’o serbisu iha terrenu.
“Hau orgullu no agradese tebes tanba ha’u hanesan feto ida bele hetan tan apoiu motór husi Governu, ida-ne’e fasilita tebes ha’u bele hala’o ha’u-nia serbisu ho di’ak, liu-liu iha área rurál iha munisípiu Aileu nian,” dehan nia.
MSSI aloka orsamentu ba sosa motór 15 hamutuk $57.000 maibé konta ho komputadór no kadeira ne’e besik $100.000.
Jornalista : Arminda Fonseca
Editora : Julia Chatarina

