iklan

POLÍTIKA

Saudozu SUKARNO: “Ha’u la halo funu, povu mak halo funu”

Saudozu SUKARNO: “Ha’u la halo funu, povu mak halo funu”

Saudozu Armando da Costa Sequeira “SUKARNO”. Imajen/Espesiál.

DILI, 13 maiu 2024 (TATOLI)—Veteranu Armando da Costa Sequeira ho naran revolusionáriu SUKARNO (Soekarno) nia luta ba Timor-Leste nia ukun rasik-aan nakonu ho mata-ween, raan, terus no sofrimentu oioin.

Iha odamatan boot fulan-maiu nia oin, liuliu Timor-Leste atu komemora restaurasaun independénsia ba da-22 (20 maiu 2002—20 maiu 2024), Aman lalehan moris nia na´in bolu hikas veteranu SUKARNO ba Maromak nia umaa (hakotu iis) iha Hospitál Nasionál Guido Valadares (HNGV), iha kinta (09 maiu 2024), iha tuku 16h00 lorokraik.

Durante moris, tanba lori prezidente Indonézia dahuluk nia naran (Soekarno), saudozu SUKARNO onsetu ba prosesu luta no onestu ba nia aan rasik, hanesan Prezidente Repúblika Indonézia, Ir. SOEKARNO, onestu ba nia aan rasik hodi dehan; Ha’u ne’e sei la sai buat ida se lahó povu. Ha’u sai boot tanba povu, ha’u luta tanba povu no ha’u mak hatutan povu nia lian [nanál].”

Evidensia loloos mak ne´e. Bainhira saudozu SUKARNO detein iha SGI (Satuan Gabungan Intelijen) Colmera-Dili no liberta iha jullu 1993, SGI fó oferta ba saudozu kareta Kijang ida (1), uma mutin ida (1) no Osan Rupiah ka Rp. 10 juta hodi bele ko’alia sai saudozu Ma’Hodu nia paraderu, maibé saudozu rejeita totál oferta hirak ne’e hodi dehan; “Ha’u sei la trai ha’u-nia prinsipiu luta nian ho materiál hirak ne’e”.

Ho domin boot ba rai-lulik Timor-Leste, saudozu SUKARNO mós ho brani esplika ba pak Harto kona-ba naran revouluzionáriu SUKARNO hanesan Prezidente Indonézia Ir. SOELARNO nia naran ne’e hodi dehan; “Se imi-nia prezidente Soekarno konsege lori imi-nia nasaun konkista independénsia, ha’u uza mós naran Sukarno atu luta ba ha’u-nia rain nia independénsia”. 

Nune’e, Timor-Leste hadau nia ukun rasik aan liuhusi konsulta popular iha 30 agostu 1999 ne´e, tanba karik kumpre hotu ona nia misaun durante luta iha tempu rezisténsia, saudozu SUKARNO deside atu moris hakmatek ho nia família iha Audian-Dili.

Se Prezidente dahuluk ba Negara Kesatuan Republik Indonesia (NKRI), Ir. Soekarno hateten, “Ha’u hatene, ukun rasik-aan la hakotu problema, ukun rasik-aan sei harii [dezenvolve] problema, maibé ukun rasik-aan mós sei fó dalan atu hakotu problema hirak ne’e”,  entaun saudozu SUKARNO ho firme hateten nia sei la hanorin ka lakohi atu nia oan sira tane liman ba Estadu tanba ninia luta mak liberta povu no rai Timor-Leste,

Saudozu Armando da Costa Sequeira “SUKARNO” ho Francisco Guterres Lú olo. Imajen/Espesiál.

Durante sei moris, saudozu SUAKARNO hameno hela lia-tatoli ba nia oan sira nune´e; “Funu hotu ona, ha’u tenke moris hakmatek ho ha’u-nia família nu’udar povu simples ida. Ha’u la halo funu! FALINTIL hamutuk ho POVU mak halo funu hodi liberta ona rai ida-ne’e. Tanba ne’e, Ha’u sei la tane liman ba Estadu no ha’u lakohi mós atu ha’u nia oan sira tane liman ba Estadu”.

Iha prosesu partisipasaun luta, saudozu SUKARNO nu’udar estafeta estratega no xave hodi halo ligasaun a nível nasionál, hodi halo ligasaun direta ho Komandante em Xefe FALINTIL Kay Rala Xanana Gusmão, saudozu Ma’Huno, saudozu Ma’Hodu, saudozu komandante Daitula, Komandante Lere Anan Timur, saudozu Konis Santana, Komandante Falur Raye Laek, CDF Lú-Olo, Komandante Sabika no Komandante Ular iha fronteira.

Biografia Saudozu Armando da Costa Sequeira “SUKARNO”

Saudozu Armando da Costa Sequeira (tuir mai sei bolu ho Sukarno nu’udar Estadu RDTL nia ema ne’ebé mate) moris iha loron 10 fulan Agostu tinan 1945 iha Suku Nahareka, Postu Administrativu Ossú, Munisípiu Vikeke, husi família Sr. Manu-Lequi (falesidu) no sra. Labu-Gamo (falesida). Saudozu nu’udar oan daruak husi maun alin na’inneen (6) mak hanesan Sra. Carmelinda da Costa e Silva, saudozu Sukarno, Sr. Julio Peichoto (falesidu) no Sr. José Morais Antunes (Maulelo) ho anju na’in-rua (2).

Saudozu hala’o nia vida infantil no adoloxente iha ninia moris fatin iha Baibuna-Isi Samarogo no bainhira nia aman-inan mate, saudozu hela ho nia tiun sira iha Nahareca uma kain Omabere Maurate. Nune’e, saudozu frekuenta mós ninia estudu primária iha Koléjiu Pe. Manuel Luis Ossú. Maibé, tanba kestaun kultura no fatór seluk tan, saudozu labele ramata ninia estudu 1ª Classe iha koléjiu refere.

Iha loron 20 fulan-Outubru tinan 1975 saudozu diside simu sakramentu kaben ho Sra. Julieta Guterres Freitas (Bui Si’ak) husi uma kain Omabere Darenau, bainhira detein hela iha sela laran tanba opsaun polítika altura ne’ebá. Husi kazamentu ne’e, saudozu ho nia kaben ko’us oan mane na’in-hitu (7) no oan feto na’in-tolu (3), no husi oan na’in 10 ne’e na’in-rua (2) fila uluk ona ba mundu seluk iha tinan hirak liu ba kotuk.

Partisipasaun iha Funu ba Ukun Rasik Aan

Períodu Baze de Apoiu

  • Iha tinan 1975 to’o fulan-Jullu tinan 1976, saudozu nu’udar delegadu FRETILIN aumezmu tempu eleitu nu’udar liurai ajudante suku Nahareka.
  • Iha fulan-Jullu tinan 1977 to’o fulan-Jullu tinan 1978, saudozu nomeadu nu’udar Xefe Aldeia Lamaus, Nahareka husi zona 15 de Agostu unidade tolu (3). Iha períodu ne’e, saudozu simu Komisáriu Polítiku Nasionál CCF, kamarada saudozu Bie Ky Sahe, Komandante Seitór Lino Olocassa no kamarada Kay Rala Xanana Gusmão hodi halo esklaresimentu ba populasaun sira.
  • Husi fulan Agostu to’o outubru tinan 1978, saudozu organiza ninia populasaun sira tuir dalan ba Matebian ho atividade polítika oioin.
  • Iha loron 23 fulan-Novembru tinan 1978, saudozu kumpre rendisaun kondisionadu tuir orientasaun Komité Sentrál FRETILIN nian iha foho Matebian tanba baze de apoiu rahun ona. Saudozu ho família rende iha Postu Ossú iha tinan 1978 nia rohan.
  • Iha fulan-Fevereiru tinan 1979, saudozu detidu iha Koamdo Rayon Militer (KORAMIL) Ossú.
  • Iha inisiu tinan 1980, saudozu hamutuk ho saudozu António Sequeira (Mau Brani) halo ligasaun ho komandante David Alex Daitula, komandante Rosito no saudozu Mau Selow no harii kaixa rua hanesan kaixa Guni Boko no Kaixa Mu’a Gia. Responsável ba kaixa rua ne’e mak Kasa Kia, Aasswa’in no António Ai tahan Matak. Husi ne’e, hamutuk ho padre Domingos Maubere halo ligasaun exterior nian. Harii mós núkleu SIRNAK husi komando destakamentu COLUNA NEGRA husi saudozu Agostinho Fera Lafaek, komandante Ologari Aasswa’in no Joni Metan Kelikai.

Períodu Reorganizasaun Rezisténsia

  • Bainhira muda hikas ona mai suku Nahareka, saudozu hetok intensifika liután servisu klandistina nian no hala’o ligasaun ho Komandante Daitula, saudozu Kakai no saudozu Xilixhana ba habelar rede klandistina nian.
  • Iha períodu sira-ne’e, estabele kaixa Zona Kokeiru nian iha aldeia Darenau, Suku Nahareka. Membru sira kaixa ida-ne’e nian mak hanesan saudozu komandante Rosito, saudozu komandante Bendito (Mausero), saudozu Xisto (Kaer Liman), saudozu Silvino Faria (Kaer Fini), saudozu António Sequeira (Mau-Brani), saudozu Sukarno, saudozu Uatumisa, sra. Ana Rofina (Bi-Ana), sra. Isabel da Cruz (Tonelu), sra. Julieta Freitas (Bui-Si’ak), sr. Marito (Labinawa), Sr. Francelino (Abure), sr. Morais (Maulelo) no saudozu Cândido (Kaer Funu).
  • Iha fulan-Agostu tinan 1983, tanba presaun husi forsa Indonézia, saudozu deside halai sai husi suku Nahareka atu ba hamutuk ho gerilleiru sira iha ai-laran hamutuk ho nia kompñeru sira hanesan sr. Francelino Abure, sr. António Gomes ho nia alin sr. Maulelo.
  • Iha tinan 1984, hamutuk ho saudozu Cândido Babo (Kaer Funu) simu karta husi komandante Daitula no Ma’Hodu Raan Kadalak hodi hasoru malu ho saudozu Filomeno Gomes (Fera Lafaek) hodi haruka karta ne’e ba Dr. José Ramos Horta iha diáspora.
  • Iha tinan 1985, saudozu Sukarno ho saudozu Kaer Funu simu tan karta ida husi Comisário Político Nacional Ma’Hodu no komandante Daitula hodi entrega ba saudozu Fera Lafaek iha Dili hodi haruka ba diáspora.
  • Iha loron 01 fulan-Marsu tinan 1986, saudozu hetan kapturasaun husi forsa Indonézia iha Suku Nahareka hamutuk ho ninia kompañeru sira hanesan saudozu Cândido (Kaer Funu), sr. Vicente Alves, sr. Raimundo, sr. Santiago da Costa Tilman (falesidu), no sr. Orlando Ko’odara.
  • Husi loron 02 to’o loron 15 fulan-Marsu, detidu iha rezidénsia Camat Ossú iha Uaibua, hodi hetan torturasaun no intimidasaun dezumanu; hoban iha kolan laran no doku ho bidon loro-loron, xoke ho elétriku no riba ho fatuk iha kolan laran.
  • Iha loron 16 fulan-Marsu tinan 1986, komandu haruka fila hika sr. Raimundo, sr. Santiago no sr. Orlando ba suku Nahareka, enkuantu, saudozu Sukarno hamutuk saudozu Cândido no sr. Vicente transporta ba Satuan Gabungan Intelijen (SGI) Baucau hodi detein sira na’in-tolu (3) durante loron 15 nia laran.
  • Iha loron 31 fulan-Marsu tinan 1986, militár sira tula sira na’in-tolu (3) mai Komarka Bexora hodi detein sira durante fulan ualu (8) nia laran.
  • Iha loron 24 fulan-Dezembru tinan 1986, saudozu Sukarno hamutuk ho nia primu saudozu Cândido simu pena kadeia tinan lima (5) enkuantu sr. Vicente Alves simu pena tinan rua (2) fulan tolu (3). Sira na’in-tolu (3) kumpre sentensa referida iha komarka Balide. Durante iha komarka Balide, saudozu hetan vizita husi Crus Vermelha Internasionál (ICRC), to’o loron 26 fulan-Novembru 1987. Iha komarka laran, saudozu Sukarno simu nafatin karta husi Komandante Daitula liuhusi saudozu Kulu Tunu no kamarada Marcelino (Uaimo Besitaur) hodi entrega tutan ba Sr. João Suryano ho Sr. Igildo de Jesus. Iha tempu ne’e mós, harii mós Órgaun nº. 8 iha CRRN nia okos ho membru sira hanesan saudozu Afonso da Costa Rangel (Leki Malik Tatamohu), Kamarada Berek, Kamarada Octavio Soares Pinto (Rama Hana), saudozu Fernando da Costa Soares (Buka Dalan), kamarada Henrique Belmero da Costa (Lelo Sahe) no kamarada Albino Soares.
  • Saudozu hetan liberdade husi Komarka Balide iha loron 19 fulan-Fevereiru tinan 1988, tuir rekomendasaun husi Kementerian Kehakiman Republik Indonesia ka Ministériu Justisa Indonézia ninian iha altura ne’ebá.
  • Hafoin livre husi kadeia, iha loron 25 fulan-Dezembru tinan 1988, saudozu Sukarno nomeadu nu’udar Vise Responsável Kaixa Haburas to’o loron 14 fulan-Fevereiru tinan 1991. Saudozu mós simu karta husi Tetum Aitahan Matak, Shalar Kosi no saudozu Fernanado Araújo Lasama kona-ba harii RENETIL iha Jakarta-Indonézia hodi entrega ba Comando Superiór da Luta.
  • Iha tinan 1989, saudozu simu mós karta orientasaun husi komandante Daitula hodi orienta órgaun nº. 8 atu halo manifestasaun iha vizita Santidade Papa João Paulo II iha Tasi-Tolu, Dili.
  • Iha tinan 1990, saudozu hamutuk ho nia kompañeru seluk halo enkontru ida iha Osoluga-Samalari-Baucau atu harri Komité Ezekutivu ho naran Nova Direção da Frente (NDF) atu responsabiliza servisu tomak ba saudozu Ma’Hodu Raan Kadalak no Komandante em Xefe Kay Rala Xanana Gusmão. Membru ba Komité Ezekutivu no OPRC mak Constâncio Pinto (Terus), José Manuel Fernandes (Nakfilak), Sr. Donanciano Gomes (Buras Anin Timur), António Aitahan Matak no membru 12 seluk.
  • Iha tinan 1990 mai to’o 1993, saudozu Sukarno servisu hamutuk ho saudozu Sabalae, saudozu Tuloda, Sr. Liurai Tasi no sr. Lelosae hodi intensifika rede klandistina nian iha Dili no servisu tomak konsentradu di’ak-liu iha Becora, iha mana Biyanti nia uma.
  • Iha loron 15 fulan-Fevereiru tinan 1992, saudozu nomeadu nu’udar Vice Responsável ba kaixa Jerál “NAKROMAN do CSL (Comando Superior da Luta)” nian iha Dili. Kargu ida-ne’e saudozu asume to’o fulan-Abril 1993.
  • Iha loron 17 fulan-fevereiru tinan 1992, saudozu lori orientasaun ne’ebé hakerek husi komandante Xanana hodi entrega ba Sr. Lú-Olo ne’ebé entrega iha área Manatuto no simu husi sr. Maumesak. Iha tinan ne’e mós hamutuk ho saudozu Segeria, tula saudozu Ma’Hodu husi Viqueque mai Dili ho Kamioneta Dolog nian.
  • Iha fulan-Maiu tinan 1993 nia klaran, intel ka mauhuu Satuan Gabungan Intelijen (SGI) nian sira kaer hikas saudozu Sukarno hodi detein iha SGI Colmera Dili no liberta hikas nia iha fulan-Jullu tinan hanesan. Iha períodu ne’e, saudozu hetan oferta husi SGI atu simu kareta Kijang ida (1), uma mutin ida (1) no Osan Rupiah ka Rp. 10 juta hodi bele ko’alia sai saudozu Ma’Hodu nia paraderu, maibé saudozu rejeita totál oferta hirak ne’e hodi dehan; “ha’u sei la trai ha’u-nia prinsipiu luta nian ho materiál hirak ne’e”. Saudozu mós ho brani esplika ba pak Harto kona-ba naran Sukarno ne’ebé nia uza hodi dehan: “Se imi nia prezidente Soekarno konsege lori imi nia nasaun konkista independénsia, ha’u uza mós naran Sukarno atu luta ba ha’u nia rain nia independénsia”.
  • Husi tinan 1993 mai oin, saudozu subar lemo-lemo iha Dili laran hanesan iha nia kompañeru Nakfilak nia uma iha Fatuk-hun, iha saudozu Segeria nia uma iha Hali laran, iha saudoza Leonora nia uma iha ponte my friend, iha mana Biyanti nia uma, iha saudozu Atingu nia uma, iha saudozu Kaer Funu nia uma no subar to’o iha Ermera hamutuk ho matebian Pe. Mario Belo (padre Uailili-oan) no uma seluk tan ne’ebé lakonsege identifika.
  • Iha tinan 1996, hamutuk ho saudozu Gamuloi Hammer, tula sr. Lú-Olo husi Uaimori mai Dili no asegura durante tempu hirak nia laran hodi tula hikas fali ba Uaimori.
  • Saudozu iha ligasaun di’ak tebes mós ho organizasaun rezisténsia juvenil sira, liuliu ho OJETIL, OBJELATIL no seluk tan.
  • Durante hala’o servisu klandistina nian, saudozu nia pozisaun hanesan Vice responsável Kaixa Haburas no Vice Responsável Kaiça Geral do CSL hamutuk ho saudozu TULODA nu’udar responsável kaixa. Kaixa Haburas kobre unidade tolu (3) hanesan Unidade I (Lospalos, ponta Leste), unidade II (Divake) no unidade III (Kosteira do sul, Viqueque). Enkuantu, Kaiça da Libertação kobre unidade IV Cruzeiro no rejiaun militar fronteira “Haksolok”. Aleinde kaixa hirak ne’e, saudozu hola parte mós iha kaixa “male-male, kaixa Inglatera, instala mós kaixa SPSF iha Comoro hamutuk ho saudozu Hammer, irmaun Miquito ho sira seluk tan.
  • Saudozu Sukarno nu’udar estafeta estratega no xave hodi halo ligasaun a nível nasionál. Nune’e, saudozu Sukarno iha ligasaun direta ho Komandante em Xefe FALINTIL Kay Rala Xanana Gusmão, saudozu Ma’Huno, saudozu Ma’Hodu, saudozu komandante Daitula, Komandante Lere, saudozu Konis Santana, Komandante Falur, CDF Lú-Olo, Komandante Sabika no Komandante Ular iha fronteira. Aleinde nu’udar estafeta nasionál, saudozu hola parte mós iha vida gerrilia nian tanba kuaze loro-loron, saudozu moris ba-mai de’it iha ai-laran hodi abandona hela ninia família rasik.
  • Saudozu lori jornalista internasional lubuk ida hodi ba hasoru malu ho Komandante Daitula no seluk tan, lori mós médiku balu hodi ba kura komandante FALINTIL nian iha ai-laran.

Tempu CNRT rezisténsia nian

  • Intensifikamente halo ligasaun ho Conselho Diretiva FRETILIN nian ne’ebé xefia husi prezidente Lú-Olo.
  • Halo tuir nafatin orientasaun saudozu Ma’Hodu no Mau Honu nia orientasaun iha Frente Polítika Interna sedeadu iha Balide-Dili no kontinua ba mai ai-laran.

Vida Pós Rezisténsia

  • Tuun husi Uaimori, saudozu estabelese armajen militár nian ida iha uma Audian no kontinua hamutuk ho prezidente Lú-Olo iha remexio no Aileu
  • Bainhira tama ona ba períodu rezisténsia nian, tanba kumpre hotu ona misaun sira hotu, saudozu deside atu moris hakmatek ho nia família iha Audian-Dili.
  • Iha tinan 2013, tanba pankada lubuk ida-ne’ebé saudozu simu durante tempu rezisténsia nian, saudozu apaña moras grave hodi baixa iha Hospitál Nasionál Guido Valdares Dili. Nune’e, Estadu liuhusi Governu Konstitusionál dahaat (IV) altura ne’ebá, fasilita saudozu hodi hetan tratamentu iha Ospital Surabaya-Indonézia.
  • Iha tinan 2015, saudozu apaña fila-fali moras rins (disfunsaun rins) no obrigadu tenke hala’o regularmente prosesu emodializa ka fase raan loron rua (2)kada semana. Durante prosesu fase raan, Estadu fasilita mós saudozu hodi hetan atendimentu saúde iha Ospital Sanglah Bali durante tinan 2015 to’o 2020 nia laran. Hafoin ne’e, saudozu rasik diside atu fase raan de’it iha Dili hodi besik nafatin ninia família. Tama iha fim fulan Abril tinan ne’e, saudozu nia kondisaun hahú hetan komplikasaun.
  • Iha loron 09 fulan-Maiu tinan 2024, saudozu nia kondisaun grave aat liu ona no família diside lori ba HNGV hodi hetan atendimentu. Maibé, buat hotu la konsege, nune’e saudozu husik hela ninia família no ita hotu hodi fila hikas ba mundu eternidade nian iha tuku 16h00 lorokraik.

Estadu RDTL liuhusi Conselho Combatentes da Libertação Nacional rekoñese saudozu ho Pensão Especial de Reforma Escalão 1, 20 a 24 anos de participação a tempo inteiro. Saudozu kondekoradu ho Ordem Nicolao Lobato iha loron 28 fulan-Novembru tinan 2008. Saudozu rejistradu nu’udar veteranu ativu ho númeru Fixa VFC-VFCC10002.

Saudozu nia liafuan ba ami oan sira kona-ba nia partisipasaun iha funu mak: “Funu hotu ona, ha’u tenke moris hakmatek ho ha’u-nia família nu’udar povu simples ida. Ha’u la halo funu! FALINTIL hamutuk ho POVU mak halo funu hodi liberta ona rai ida-ne’e. Tanba ne’e, Ha’u sei la tane liman ba Estadu no ha’u lakohi mós atu ha’u nia oan sira tane liman ba Estadu”.

Adeus saudozu Sukarno, ami-nia aman doben ne’ebé hadomi tebes ami oan no beioan sira hotu. Deskansa ho hakmatek ba ami-nia aman doben no obrigadu barak ba domin tomak no dedikasaun eskluzivu ne’ebé Ita-Boot halo ona ba rai ida ne’e. Adeus eterna saudozu Sukarno no EROI NUNKA MATE!

TATOLI

iklan
iklan

Leave a Reply

iklan
error: Content is protected !!