DILI, 14 Maiu 2024 (TATOLI)–Diretór Ezekutivu Klinika Bairru Pité, Kewen Robert Lu Pereira, hateten ai-moruk esensiál item 39 iha klinika Bairru Pité agora daudaun stock out.
Ai-moruk esensiál sira-ne´e mak hanesan sinvastatin 20mg, promethazin HCL injection 25mg/ml, bromhexine cough Syrup 4mg/5ml, folic acid tablet 5mg no 1 mg no seluk tan.
Nia hateten, iha dadus klinika Bairru Pité iha mós menus produtu konsumiveis hanesan Syringe desposable 10 ml no suture absorb catgut chromic 2/0 (M3.5) 75cm 3/8 Cir 26 mm RB Box/12.
“Ami stock out ai-moruk nian agora daudaun ami iha 39 item, ne’e maioria ai-moruk ne’ebé ita uza beibeik hanesan ai-moruk esensiá,” Diretór Ezekutivu Klinika Bairru Pité, Kewen Robert Lu Pereira, hateten ba jornalista sira iha Bairru Pité.
Diretór ezekutivu ne´e hateten, ai-moruk sotck out ne’e profisionál halo reseita alternativa ba pasiente sira hodi bele halo tratamentu ne’ebé depende ba moras sira aprezenta.
Tanba ne´e, nia dehan, nia parte halo ona pedidu ba iha Institutu Nasionál Farmasia no Produtu Medikamentu (INFPM) hodi bele fornese ai-moruk ba iha klínika mak medikamentu ne’ebé sira uza fó ba labarik sira, ba atendimentu ema moras raan midar sira-ne´e.
“Ami hato’o ona pedidu ba INFPM dezde semana kotuk no kolega sira sei hato’o tan. Ami hato’o pedidu sira responde diretamente ba kazu emerjénsia sira, maibé depende ba stock out ai-moruk iha nasionál,” nia dehan.
Tuir nia, ai-moruk hanesan Antasida no Metraprazol ba atendimentu pasiente moras stomuk mak laiha, tanba ne’e mak tenke halo reseita ba pasiente sira.
Jornalista : Jesuína Xavier
Editór : Cancio Ximenes
